రెండోసారి సుక్కూతో రానా.. మ‌రో శిష్యుడికి ఛాన్స్!

సుకుమార్ రైటింగ్స్ పేరుతో సొంతంగా బ్యాన‌ర్ ప్రారంభించిన సుకుమార్ ఈ సంస్థ నుంచి న‌వ‌త‌రం ద‌ర్శ‌కుల్ని ప్రోత్స‌హిస్తున్న సంగ‌తి తెలిసిందే. సుక్కూ నిర్ధేశ‌నంలో బౌండ్ స్క్రిప్టులు రెడీ అవుతుంటే వాటికి ప్ర‌తిభావంతులైన యువ‌కులు ద‌ర్శ‌క‌త్వం వ‌హిస్తూ బ్లాక్ బ‌స్ట‌ర్లుగా మ‌లుస్తున్నారు. యువ‌హీరోల‌కు అదిరిపోయే బంప‌ర్ హిట్లు ఇస్తున్నారు. నాగ‌చైత‌న్య‌- రాజ్ త‌రుణ్ - వైష్ణ‌వ్ తేజ్ వంటి హీరోల‌కు బ్లాక్ బ‌స్ట‌ర్ హిట్లు ఇచ్చి కెరీర్ ప‌రంగా తిరుగులేని స్థానాన్ని క‌ట్ట‌బెట్టింది సుక్కూ శిష్యులే.

తాజా స‌మాచారం మేర‌కు యువ‌హీరో రానా కూడా సుకుమార్ శిష్యుడి ద‌ర్శ‌క‌త్వంలో న‌టించేందుకు గ్రీన్ సిగ్న‌ల్ ఇచ్చార‌ని తెలుస్తోంది. సుక్కూ స‌హాయ‌కుడు వెంకీ దర్శకుడిగా రానా హీరోగా ఓ సినిమా తెర‌కెక్క‌నుంది. అయితే రానాకు ఇదే తొలి సారి కాదు. ఇంత‌కుముందు కూడా సుకుమార్ శిష్యుడి నిర్ధేశ‌నంలోనే నా ఇష్టం అనే సినిమాలో న‌టించారు. కానీ ఆ సినిమా డిజాస్ట‌ర్ అయ్యింది. చాలా గ్యాప్ త‌ర్వాత ఇప్ప‌టికి మ‌రోసారి సుకుమార్ శిష్యుడికి రానా అవ‌కాశ‌మివ్వ‌డం హాట్ టాపిక్ గా మారింది. క‌నీసం ఈసారైనా రానాకు సుక్కూ కాంపౌండ్ హిట్టిస్తుందా? అంటూ ఆస‌క్తిక‌ర చ‌ర్చ సాగుతోంది.

ఇటీవ‌ల సుకుమార్ రైటింగ్స్ మంచి ఊపు మీద ఉంది కాబ‌ట్టి రానాకు ఇది ప్ల‌స్ అవుతుంది. సుక్కూ-రానా-వెంకీ కలయికకు సంబంధించి అధికారిక ప్రకటన త్వరలో రానుంది. 14 రీల్స్ ప్లస్ వివ‌రాలు వెల్ల‌డించ‌నుందిట‌.