సందీప్ వంగా ప్రాజెక్ట్ పై క్లారిటీ ఇచ్చిన బాలీవుడ్ హీరో..!

'అర్జున్ రెడ్డి' సినిమాతో సెన్సేషనల్ హిట్ అందుకున్న సందీప్ రెడ్డి వంగా.. ఒక్క సినిమాతోనే టాప్ లీగ్ డైరెక్టర్స్ లిస్ట్ లో చేరిపోయాడు. దీంతో వెంటనే బాలీవుడ్ స్టార్ హీరోని డైరెక్ట్ చేసే ఛాన్స్ కొట్టేసాడు. 'అర్జున్ రెడ్డి' సినిమాను షాహిద్ కపూర్ తో 'కబీర్ సింగ్' పేరుతో హిందీలో రీమేక్ చేసి బాలీవుడ్ లో కూడా సాలిడ్ హిట్ అందుకున్నాడు. దీంతో సందీప్ వంగా కి బాలీవుడ్ ‏లో వరుస అవకాశాలు వచ్చిపడ్డాయి. టీ-సిరీస్‌ ప్రొడక్షన్ హౌస్ సందీప్‌ తో కలిసి పనిచేయడానికి ఒప్పందం కుదుర్చుకుంది. ఈ క్రమంలో బాలీవుడ్ హీరో రణ్‌ బీర్ కపూర్‌ తో కలిసి సినిమా చేయనున్నాడని ఎప్పటినుంచో వార్తలు వస్తున్నాయి. కానీ ఈ సినిమాపై ఇంతవరకు అధికారిక ప్రకటన రాలేదు. సందీప్ ఈ ప్రాజెక్ట్ ఉందని చెప్పినప్పటికీ లేట్ అవుతూ వస్తుండడంతో రణబీర్ ఈ సినిమా చేయడం లేదనే రూమర్స్ వచ్చాయి. ఈ నేపథ్యంలో తాజాగా ఓ ఇంటర్వ్యూలో మాట్లాడిన రణబీర్.. సందీప్ తో సినిమాని కన్ఫర్మ్ చేశాడు.

రణబీర్ కపూర్ తన అప్ కమింగ్ ప్రాజెక్ట్స్ గురించి మాట్లాడుతూ సందీప్ రెడ్డి వంగా తో ఓ సినిమా చేయబోతున్నానని.. 2021 ద్వితీయార్థంలో ఈ సినిమా సెట్స్ పైకి వెళ్లే అవకాశం ఉందని తెలిపాడు. దీంతో 'కబీర్ సింగ్' సినిమా తర్వాత సందీప్ మరో ప్రాజెక్ట్ అనౌన్స్ చేయడం లేదని నిరాశ చెందిన వారు ఖుషీ అవుతున్నారు. ఇదిలా ఉండగా ఇది గ్యాంగ్ స్టర్ కథాంశంతో రూపొందే భారీ యాక్షన్ ఎంటర్టైనర్ అని టాక్ నడుస్తోంది. దీనికి ముందుగా 'డెవిల్' అనే టైటిల్ ప్రచారంలో ఉండగా.. ఇప్పుడు 'యానిమల్' అనే టైటిల్ ని పెట్టబోతున్నారని అంటున్నారు. మరోవైపు ఇదొక లవ్ స్టొరీ అనే టాక్ కూడా ఉంది. మరి ఈ సినిమా యాక్షన్ మూవీనా? లేదా లవ్ స్టోరీ నా అనేది తెలియాల్సి ఉంది. ప్రస్తుతం రణబీర్ కపూర్ నటిస్తున్న 'బ్రహ్మాస్త్ర' 'షంషేర్' చిత్రాలు పూర్తైన తర్వాత సందీప్ ప్రాజెక్ట్ ని సెట్స్ పైకి తీసుకెళ్లనున్నాడు.