వీకెండ్ కలెక్షన్స్: 'జాతిరత్నాలు' తర్వాతి స్థానంలో నిలిచిన 'రంగ్ దే'

యూత్ స్టార్ నితిన్ - 'మహానటి' కీర్తి సురేష్ హీరోహీరోయిన్లుగా వెంకీ అట్లూరి తెరకెక్కించిన సినిమా ''రంగ్ దే''. సితార ఎంటర్టైన్మెంట్స్ బ్యానర్ పై సూర్యదేవర నాగవంశీ ఈ చిత్రాన్ని నిర్మించారు. శుక్రవారం ప్రేక్షకుల ముందుకు వచ్చిన ఈ యూత్ ఫుల్ ఫ్యామిలీ ఎంటర్టైనర్ బాక్సాఫీస్ వద్ద మంచి కలెక్షన్స్ రాబడుతోంది. ఈ వారం విడుదలైన వాటిలో మంచి టాక్ తెచ్చుకున్న సినిమా ఇదే కావడంతో తొలి రోజు 5.43 కోట్ల షేర్ వసూలు చేసిన ఈ చిత్రం.. మూడు రోజుల్లో దాదాపు 10 కోట్లకు పైగా షేర్ వసూలు చేసినట్లు ట్రేడ్ వర్గాలు చెబుతున్నాయి.

కోవిడ్ సెకండ్ వేవ్ పరిస్థితుల్లో తెలుగు రాష్ట్రాల్లో 'రంగ్ దే' సినిమా 10.35 కోట్ల షేర్ రాబట్టడం అంటే మామూలు విషయం కాదు. నైజాం - 3.79 కోట్లు.. సీడెడ్ - 1.66 కోట్లు.. వైజాగ్ - 1.30 కోట్లు.. గుంటూరు - 1.09 కోట్లు.. ఈస్ట్ - 0.85 కోట్లు.. వెస్ట్ - 0.57 కోట్లు.. కృష్ణ - 0.65 కోట్లు.. నెల్లూరు - 0.44 కోట్లు కలుపుకుని మొత్తం 10.35 కోట్ల షేర్ గా ట్రేడ్ లెక్కలు ఉన్నాయి. సోమవారం హోళీ సెలవు కావడంతో ఈరోజు కూడా బాగానే వసూలు చేసే అవకాశం ఉంది.

ఇక ఓవర్ సీస్ లో కూడా ఈ సినిమా డీసెంట్ వసూళ్ళు రాబడుతోంది. 1.5 కోట్లకు అమ్ముడైన ఈ సినిమా ఇప్పటికే 270K డాలర్లు రాబట్టి 1.90 కోట్లతో బ్రేక్ ఈవెన్ అయినట్లు తెలుస్తోంది. అంతేకాక 2021లో 'జాతిరత్నాలు' తర్వాత ఎక్కువ కలెక్షన్స్ సాధించిన ఇండియన్ సినిమాగా 'రంగ్ దే' నిలిచింది. నితిన్ కి ఈ ఫిగర్స్ తక్కువే అయినప్పటికీ కరోనా పాండమిక్ నేపథ్యంలో మంచి కలెక్షన్స్ గానే చెప్పవచ్చు.