రంగమ్మా.. మంగమ్మా.. తిరుగే లేదమ్మా

ఈ ఏడాది మొదటి బ్లాక్ బస్టర్ సాధించిన ఘనత రంగస్థలం దక్కించుకుంది. 80ల నాటి విలేజ్ బ్యాక్ గ్రౌండ్ గా వచ్చిన ఈ మూవీ ప్రేక్షకులను విపరీతంగా ఆకట్టుకుంది. ఈ సినిమా కలెక్షన్ల పరంగానే కాదు.. మ్యూజికల్ గానూ తిరుగులేని హిట్ క్రెడిట్ దక్కించుకుంది. దాదాపుగా ఈ సినిమాలో పాటలన్నీ ప్రేక్షకులను మెప్పించాయి. ఇప్పడు ఇందులోని ఓ పాట ఇప్పుడు రికార్డులను తిరగరాస్తోంది.

రంగస్థలం మూవీలోని రంగమ్మా.. మంగమ్మా పాట ఆడియో రిలీజ్ టైం నుంచే ఆడియన్స్ కు తెగ నచ్చేసింది. సినిమా రిలీజయ్యాక అందులో సమంత డ్యాన్స్.. పాట పిక్చరైజేషన్ అందరికీ పిచ్చపిచ్చగా నచ్చేసింది. ఈ పాట వీడియో యూట్యూబ్ లో పెట్టిన నెలరోజులకే రికార్డు స్థాయిలో వ్యూస్ వచ్చాయి. అతి తక్కువ టైంలో 40 మిలియన్లకు పైగా వ్యూస్ ఈ పాటకు వచ్చాయంటే జనాలు ఎంత ఉత్సాహంగా ఈ పాట చూస్తున్నారో అర్ధం చేసుకోవచ్చు. రోజురోజుకు ఈ పాట చూసే ప్రేక్షకుల సంఖ్య పెరుగుతూ వస్తోంది.

ఇప్పటివరకు తెలుగులో అత్యధిక వ్యూస్ రికార్డ్ ఫిదాలోని వచ్చిండే.. మెల్లమెల్లగా వచ్చిండే... బాహుబలి-2లోని సాహోరే సాంగులకు ఉంది. ఈ రెండు పాటలకు ఇప్పటికి 120 మిలియన్ వ్యూస్ పైగా ఉన్నాయి. కాకుంటే ఈ రెండు పాటలు యూట్యూబ్ లో పెట్టి 10 నెలలు దాటింది. కానీ రంగమ్మా.. మంగమ్మా పాట జోరు చూస్తుంటే ఈ రికార్డును అంతకన్నా తక్కువ టైంలోనే దాటుకుని దూసుకెళ్లిపోయేలా ఉంది. మొత్తానికి చిట్టిబాబు - రామలక్ష్మి జంట మామూలుగా మాయ చేయలేదుగా.