బాక్సాఫీస్ కు హుషారిచ్చిన రంగస్థలం

2018 టాలీవుడ్ కి ఎలా ఉంటుందో అని మథన పడాల్సి వచ్చింది. తొలి మూడు నెలల్లో చాలానే సినిమాలు వచ్చాయి. వీటిలో భాగమతి.. ఛలో.. తొలిప్రేమ మినహాయిస్తే.. మరే సినిమా లాభాలు పంచలేకపోయాయి.

మొదటగా అజ్ఞాతవాసితో ఆరంభం కాగా.. పవన్ మూవీ అంచనాలను అందుకోవడంలో ఫెయిల్ అయింది. భారీ డిజాస్టర్ గా నిలిచింది. ఆ తర్వాత రంగస్థలం వరకూ.. థియేటర్లను నింపే సత్తా ఉన్న సినిమా రాలేదు. పొంగల్ కే వచ్చిన జై సింహా యావరేజ్ అనిపించుకోగా.. రంగులరాట్నం ఫ్లాప్ గా నిలిచింది. జనవరి చివరలో అనుష్క భాగమతి సూపర్ హిట్ గా నిలిచింది. ఫిబ్రవరిలో ఛలో అంటూ లవ్లీ ఎంటర్టెయినర్ అందించాడు నాగశౌర్య. మాంచి విజయం తన ఖాతాలో వేసుకున్నాడు. వరుణ్ తేజ్ తొలిప్రేమ కూడా ఎక్స్ పెక్టేషన్స్ ను నిలబెట్టుకుని.. ఈ మెగాహీరో ఖాతాలో వరుసగా రెండో విజయాన్ని వేసింది. ఇదే నెలలో టచ్ చేసి చూడు.. గాయత్రి.. ఇంటెలిజెంట్ లు నిరాశ పరిచాయి. నాని నిర్మించిన అ! మూవీకి పొగడ్తలు తప్ప డబ్బులు రాలలేదు.

ఆ తర్వాత నుంచి ఏ ఒక్క సినిమా నిలబడలేకపోయింది. ఇప్పుడు రామ్ చరణ్ మూవీ రంగస్థలం ఆ లోటు తీర్చేస్తోంది. అటు ప్రేక్షకుల సినిమా కోరికను.. ఇటు బాక్సాఫీస్ వసూళ్ల దాహార్తిని.. రెండింటినీ ఒకేసారి తీర్చేస్తోంది. మంగళవారం రోజున కూడా తెలుగు రాష్ట్రాల్లో 5 కోట్లకు పైగా 'షేర్' వసూళ్లు వచ్చాయంటే.. రంగస్థలం ఏ స్థాయి సక్సెస్ అనే విషయం అర్ధమవుతుంది.