మెగా ఫ్యాన్స్ తో రంగస్థలం టీం పార్టీ

టాలీవుడ్ ఇండస్ట్రీ రికార్డులను వరుసగా సవరించుకుంటూ దూసుకుపోతోంది రంగస్థలం. రెండో వారాంతంలో కూడా ఫస్ట్ వీకెండ్ కు ధీటుగా వసూళ్లను సాధించడం.. ఈ సినిమాపై జనాల్లో ఉన్న క్రేజ్ కు అద్దం పడుతోంది. ముఖ్యంగా ఆదివారం అయితే.. దాదాపు అన్ని ఏరియాల్లోనూ హౌస్ ఫుల్స్ సాధించేసిన రామ్ చరణ్ మూవీ.. ఇప్పటికే టాలీవుడ్ టాప్ హిట్స్ లో 4వ స్థానాన్ని అందుకుంది.

సినిమా సక్సెస్ ను పురస్కరించుకుని.. ఈ వారంలో ఓ గ్రాండ్ పార్టీ ఇవ్వాలని చరణ్ అండ్ టీం నిర్ణయించుకున్నారు. మెగా ఫ్యాన్స్ కు హుషారు తెచ్చిన మెగా పవర్ స్టార్ మూవీ సక్సెస్ ను రంగస్థలం టీంతో పాటు.. మెగా అభిమానులతో కలిపి సెలబ్రేట్ చేసుకోవాలని నిర్ణయించారు. 13 లేదా 14వ తేదీల్లో ఓ పెద్ద పార్టీ అరేంజ్ చేసి.. దీనికి రంగస్థలం మూవీతో లింక్ ఉన్న ప్రతీ ఒక్కరినీ ఆహ్వానించబోతున్నారట. ఎలాగూ చిరంజీవి ఈ పార్టీలో ఉంటారనే విషయం ప్రత్యేకించి చెప్పాల్సిన పని లేదు. రామ్ చరణ్ తో పాటు రంగస్థలం యూనిట్.. అలాగే సినిమా డిస్ట్రిబ్యూటర్లను కూడా ప్రత్యేకంగా ఆహ్వానించనున్నారట.

వీరితో పాటు మెగా అభిమానులు కూడా ఈ పార్టీలో సందడి చేయనున్నారని తెలుస్తోంది. ఇప్పటికే టాలీవుడ్ టాప్ హిట్స్ లో 4వ స్థానాన్ని ఆక్రమించిన రంగస్థలం.. మరికొన్ని రోజుల్లో ఖైదీ నంబర్ 150 చిత్రాన్ని అధిగమించి.. టాప్3 స్థానానికి చేరుకోవడం ఖాయంగా కనిపిస్తోంది.