'ఉప్పెన' నుంచి 'రంగులద్దుకున్న' వీడియో సాంగ్..!

పంజా వైష్ణవ్ తేజ్‌ - కృతి శెట్టి హీరో హీరోయిన్లుగా ప‌రిచ‌య‌మ‌వుతున్న చిత్రం ''ఉప్పెన‌''. 'మక్కల్ సెల్వన్' విజయ్ సేతుపతి కీలక పాత్రలో నటించాడు. దర్శకుడు సుకుమార్ శిష్యుడైన బుచ్చిబాబు సానా ఈ చిత్రానికి దర్శకత్వం వహించాడు. మైత్రీ మూవీ మేక‌ర్స్‌ మరియు సుకుమార్ రైటింగ్స్ బ్యానర్స్ పై ఈ సినిమా రూపొందింది. రాక్ స్టార్ దేవిశ్రీ ప్రసాద్ సంగీతం సమకూర్చాడు. ఈ చిత్రాన్ని పవాలెంటైన్స్ డే కానుకగా ఫిబ్రవరి 12న ప్రేక్షకుల ముందుకు తీసుకొస్తున్నారు. ఈ నేపథ్యంలో ప్రచార కార్యక్రమాల స్పీడ్ పెంచిన మేకర్స్ ఇటీవలే టీజర్ ని వదిలారు. ఈ క్రమంలో తాజాగా 'ఉప్పెన' నుంచి 'రంగులద్దుకున్న' అనే వీడియో సాంగ్ ని రిలీజ్ చేశారు.

సముద్ర తీరాన ఇసుక తిన్నెల్లో హీరోహీరోయిన్ల మ‌ధ్య సాగే ఈ పాట ఆకట్టుకునేలా ఉంది. 'రంగులద్దుకున్నా.. తెల్ల రంగులౌదాం.. పూలు కప్పుకున్నా.. కొమ్మలల్లే ఉందాం..' అంటూ సాగిన ఈ పాటకు దేవిశ్రీ ప్రసాద్ ప్లెజెంట్ ట్యూన్ ఇచ్చాడు. 'ఆకు చాటునున్న… పచ్చి పిందెలౌదాం.. మట్టి లోపలున్నా…జంట వేరులౌదాం' అంటూ శ్రీమణి మంచి సాహిత్యం అందించాడు. ఈ పాటను యాజిన్ నిజార్ - హరిప్రియ తమదైన శైలిలో ఆలపించారు. ఇందులో బృందం - ప్రేమ్ రక్షిత్ కంపోజ్ చేసిన క్యూట్ స్టెప్స్ అలరిస్తున్నాయి. దీనికి శ్యామ్ దత్ సైనుద్దీన్ సినిమాటోగ్రాఫర్ గా వ్యవహరించగా.. నవీన్ నూలి ఎడిటింగ్ వర్క్ చేశారు.