రణ్ వీర్ చెప్పిన కాస్టింగ్ సీక్రెట్స్

ఓ చిత్రానికి నటీ నటుల ఎంపిక చాలా కీలకమే కానీ.. ఈ పేరుతో నగ్నంగా నిలబెడతారనే ఆరోపణలు చాలానే ఉన్నాయి. అమ్మాయిలే కాదు.. అబ్బాయిలకు ఇలాంటి ఇబ్బందులు తప్పడం లేదు. ఇందులో బాలీవుడ్ లో ఈ బూతు భాగోతం బాగా ఎక్కువే. ఇవేమీ కొత్త కాదు కానీ.. ఇప్పుడు రణ్ వీర్ సింగ్.. తనకు ఇలాంటి సందర్భం ఒకటి ఎదురైందని చెప్పడంతో.. కాస్టింగ్ కహానీలు మళ్లీ హాట్ టాపిక్ గా మారాయి.

కొన్నేళ్ల క్రితం తాను అవకాశాలు వెతుక్కుంటున్న ఓ సిగ్గుమాలిన సందర్భం రణ్ వీర్ కు ఎదురైందట. ఓ బాలీవుడ్ ఫిలిం కోసం కాస్టింగ్ డైరెక్టర్ ను సంప్రదిస్తే.. అతను ఆడిషన్ కు రమ్మని పిలిచాడట. అయితే ఆడిషన్ కోసం పోర్ట్ ఫోలియో అంతా తీసుకుని వెళితే.. ఆ అడ్రస్ ఆయన ఇంటిదే. అదేంటీ.. స్టూడియోకు కాకుండా ఇంటికి రమ్మన్నాడని అనుమానించినా.. అప్పటికే పేరు ప్రఖ్యాతులున్న చాలా పెద్ద కాస్టింగ్ డైరెక్టర్ కావడంతో.. అంధేరీలో ఉన్న ఆ ఇంటి లోపలికి వెళ్లాడట రణ్ వీర్. తీరా వెళ్లాక పోర్ట్ ఫోలియో చూడ్డం మానేసి, ఒళ్లంతా తడమడం మొదలుపెట్టేశాడట. అంతే కాదు.. మొత్తం విప్పేస్తే.. ప్రైవేట్ పార్ట్స్ కూడా చూస్తానని చెప్పాడట.

దీంతో అక్కడి నుంచి సందు చూసుకుని పారిపోయాడట ఈ హీరో. తను స్టార్ గా ఎదిగిన తర్వాత.. ఆయన బాధితులు తన ఫ్రెండ్స్ లో చాలా మంది ఉన్నారనే విషయం తెలిసి ఆశ్చర్యపోయాడట రణ్ వీర్ సింగ్. ఈ విషయాలన్నీ ఓ ఇంటర్వ్వూలో స్వయంగా చెప్పేయడంతో.. బాలీవుడ్ ఉలిక్కిపడింది. ఇప్పటివరకూ ఈ కాస్టింగ్ భాగోతాన్ని ఇంత నిస్సిగ్గుగా బైట పెట్టిన హీరో రణ్ వీర్ సింగ్ ఒక్కడే.