ఎన‌ర్జిటిక్ హీరోకి తెలుగు క‌థ‌లంటే గురి

తెలుగు సినిమా క‌థ‌ల్ని ఎగ‌రేసుకుపోతున్నారు. ఇక్క‌డ బ్లాక్ బ‌స్ట‌ర్ కొట్టిన సినిమాల్ని బాలీవుడ్ లో రీమేక్ చేసేందుకు హీరోలంతా ఉవ్విళ్లూరుతున్నారు. స‌ల్మాన్ ఖాన్- అమీర్ ఖాన్- అక్ష‌య్ కుమార్- షాహిద్ క‌పూర్- అజ‌య్ దేవ‌గ‌న్ .. ఒక‌రేమిటి.. టాప్ హీరోలంతా మ‌న స్క్రిప్టుల‌పై మ‌న‌సు ప‌డుతున్నారు.

ఇదే బాట‌లో ఎన‌ర్జిటిక్ హీరో ర‌ణ‌వీర్ సింగ్ కూడా తెలుగు స్క్రిప్టుల‌పై మ‌న‌సు పారేసుకోవ‌డం ఇటీవ‌ల చ‌ర్చ‌కొచ్చింది. ఎన్టీఆర్ న‌టించిన బ్లాక్ బ‌స్ట‌ర్ మూవీ `టెంపర్` ని సింబా పేరు తో రీమేక్ చేసి అక్కడ బ్లాక్ బస్టర్ కొట్టాడు. ఇప్పుడు బ‌న్ని న‌టించిన ఇండ‌స్ట్రీ రికార్డ్ హిట్ `అల వైకుంఠపురములో` రీమేక్ లో నటించేందుకు గ్రీన్ సిగ్నల్ ఇచ్చాడ‌ట‌. ఇక తెలుగులో బ్లాక్ బ‌స్ట‌ర్ చిత్రాల్లో న‌టించాల్సిందిగా దీపిక సైతం ప‌ట్టుబ‌డుతుండ‌డంతో ర‌ణ‌వీర్ కాద‌న‌ లేక‌పోతున్నాడ‌న్న‌ది ఓ గుస‌గుస‌.

బాలీవుడ్ హంక్ రణవీర్ సింగ్ 34 వ పుట్టినరోజు సంద‌ర్భంగా ఈనెల 6న 83 మూవీకి సంబంధించిన కొత్త లుక్ ని రిలీజ్ చేశాడు. తన అభిమానులతో ప్రత్యేక బహుమతిని ఇన్ స్టాలో పంచుకున్నారు. స్పోర్ట్స్ బయోపిక్ 83లో కపిల్ దేవ్ పాత్రలో రణవీర్ న‌టిస్తున్న సంగ‌తి తెలిసిందే. హర్యానా హరికేన్ గా ప్రసిద్ది చెందిన మాజీ ఆల్ రౌండర్ క్రికెటర్ కపిల్ దేవ్ ని రణ్‌వీర్ పోలి ఉన్నాడ‌న్న ప్ర‌శంస‌లు ద‌క్కాయి. తాజా చిత్రం హర్యానాకు చెందిన కపిల్ దేవ్ అనే బాలుడి ప్రయాణాన్ని ఆవిష్క‌రిస్తుంది. 1983 క్రికెట్ ప్రపంచ కప్ ‌లో తన జట్టును గెలుపు వైపు న‌డిపించిన క‌పిల్ శౌర్యాన్ని ఆవిష్క‌రిస్తుంది. రణ్‌వీర్ ప్రస్తుతం లండన్ లో దీపికా పదుకొనే స‌హా 83 బృందంతో సెల‌బ్రేష‌న్స్ లో ఉన్నార‌ట‌.