ప్రకాష్ రాజ్.. సీన్ రివర్సవుతోంది

ఇంతకుముందు ప్రకాష్ రాజ్ బిజీగా ఉండో.. ఆయన డేట్లు సర్దుబాటు చేయలేకో.. లేక దర్శకుడితో విభేదాలు వచ్చో ఆయన ఏదైనా పాత్ర నుంచి తప్పుకోవడం.. ఆయన ప్లేస్ లోకి మరొకరు రావడం ఉండేది. ఐతే ఈ మధ్య సీన్ రివర్సవుతోంది. ఆయన వేరొకరిని రీప్లేస్ చేస్తున్నారు. ఆ మధ్య ‘గోవిందుడు అందరివాడేలే’ సినిమాలో రాజ్ కిరణ్ పాత్రను ప్రకాష్ రాజ్ తో రీప్లేస్ చేయడం గుర్తుండే ఉంటుంది. సగం పైగా సినిమా అయ్యాక ప్రకాష్ రాజ్ ఈ ప్రాజెక్టులోకి వచ్చాడు. ఆయన కోసం చాలా సన్నివేశాలు రీషూట్ చేశారు. ఇప్పుడు సుకుమార్-రామ్ చరణ్ సినిమా విషయంలోనూ ఇలాగే జరుగుతున్నట్లు సమాచారం.

ఈ చిత్రంలో ప్రకాష్ రాజ్ ఓ కీలక పాత్ర పోషిస్తున్నట్లు సమాచారం బయటికి వచ్చిన సంగతి తెలిసిందే. ఐతే ఆయన కోసం కొత్త పాత్రేమీ సృష్టించలేదు. రావు రమేష్ పాత్రనే ఆయనకు ఇచ్చారట. కారణాలేంటో తెలియలేదు కానీ.. రావు రమేష్ అర్ధంతరంగా ఈ సినిమా నుంచి తప్పుకున్నారట. ఆయనకు సుకుమార్ తో విభేదాలు తలెత్తాయని మీడియాలో ప్రచారం జరుగుతోంది. ప్రకాష్ రాజ్ ఈ మధ్య సినిమాల్లేక ఖాళీగానే ఉండటంతో ఈ పాత్రకు అడగ్గానే ఒప్పేసుకున్నాడట. సుక్కుతో ఆయనకు మంచి సంబంధాలే ఉన్నాయి. వీళ్లిద్దరూ ఇంతకుముందు ‘జగడం’ కోసం కలిసి పని చేశారు. ఇంతకుముందు రావు రమేష్ మీద తీసిన సన్నివేశాల్ని మళ్లీ ప్రకాష్ రాజ్ పై చిత్రీకరించబోతున్నారట. రాజమండ్రిలో మొదలవుతున్న కొత్త షెడ్యూల్లో ప్రకాష్ రాజ్ పాల్గొనబోతున్నాడు.

Like Us on Facebook : https://www.facebook.com/Tupakidotcom/