తండ్రికి తగ్గ తనయుడు అనిపించుకునేందుకు మరో ప్రయత్నం

టాలీవుడ్ లో 1980, 90 సినిమాల్లో అత్యధికంగా కనిపించిన విలన్ రావు గోపాల్ రావు. విలనిజంకు మారు పేరు.. విలన్ గా అద్బుత నటన కనబర్చిన నటుడు రావు గోపాల్‌ రావు. ఆయన సాటి మరెవ్వరు లేరు అనడంలో సందేహం లేదు. ఆయన నట వారసుడిగా ఎంట్రీ ఇచ్చిన రావు రమేష్ కూడా విలక్షణ నటుడు అని పేరు తెచ్చుకునేందుకు తీవ్రంగా ప్రయత్నాలు చేస్తున్నాడు. విలన్ గా క్యారెక్టర్ ఆర్టిస్టుగా ఆయన చేసిన సినిమా ఇప్పటికే ఆయన మంచి నటుడిగా పేరు తీసుకు వచ్చాయి. ఆయన తండ్రి స్థాయిని అందుకోవడం కోసం తీవ్రంగా ప్రయత్నాలు చేస్తున్నాడు. తండ్రికి తగ్గ తనయుడు అనిపించుకునేందుకు మహా సముద్రం సినిమాలో పెద్ద ప్రయోగమే చేయబోతున్నాడు.

శర్వానంద్‌ హీరోగా సిద్దార్థ్ కీలక పాత్రలో నటిస్తున్న మహా సముద్రం సినిమా లో రావు రమేష్ చాలా విభిన్నంగా కనిపించబోతున్నాడట. కథ డిమాండ్ మేరకు రావు రమేష్‌ ను దర్శకుడు గూని వాడిగా చూపించబోతున్నాడట. రావు రమేష్‌ పాత్ర సినిమాకు ప్రత్యేకంగా నిలుస్తుందని అంటున్నారు. రావు రమేష్ ఈ పాత్రతో నటుడిగా మరో మెట్టును ఎక్కడం ఖాయం అంటున్నారు. వరుసగా సినిమాల్లో నటిస్తున్న రావు రమేష్ మూస పాత్రల్లో కనిపిస్తున్నాడు అని విమర్శించే వారికి ఈ పాత్ర సమాధానంగా నిలుస్తుందని ఆయన సన్నిహితులు అంటున్నారు.

ఆర్‌ ఎక్స్‌ 100 సినిమా తో దర్శకుడిగా విమర్శకుల ప్రశంసలు దక్కించుకున్న అజయ్‌ భూపతి ఈ సినిమా కు దర్శకత్వం వహిస్తున్నాడు. దాదాపు రెండేళ్ల పాటు ఈ సినిమా స్క్రిప్ట్‌ పై వర్క్‌ చేశాడు. ప్రతి పాత్రను సన్నివేశంను అత్యంత జాగ్రత్తగా ప్లాన్‌ గా అజయ్ రెడీ చేశాడని అంటున్నారు. ఆర్‌ ఎక్స్100 సినిమాకు పూర్తి విభిన్నంగా ఉండే ఈ సినిమా చాలా ప్రత్యేకంగా ఉండి మాస్‌ ఆడియన్స్ తో పాటు ఫ్యామిలీ ఆడియన్స్‌ ను కూడా ఆకట్టుకుంటుందని అంటున్నారు. ఈ సినిమా లోని గూని వాడి పాత్ర తో రావు రమేష్ తండ్రికి తగ్గ తనయుడు అనిపించుకోవడం ఖాయం అంటూ మేకర్స్ నమ్మకంగా చెబుతున్నారు.