రాశి చూపించాల్సివి చాలా ఉన్నాయట

స్టార్ హీరోయిన్ అనిపించుకునేందుకు గట్టిగానే కష్టపడుతోంది బ్యూటీ రాశి ఖన్నా. మొదటి సినిమాతో మంచి పేరు తెచ్చుకున్న ఈ ఢిల్లీ భామ.. రీసెంట్ గా బెంగాల్ టైగర్ హిట్ తో మంచి జోష్ మీద ఉంది. ఇప్పుడు సాయిధరం తేజ్ తో సుప్రీమ్ లో నటిస్తోంది. త్వరలో ఆక్సిజన్ లో గోపీచంద్ సరసన కనిపించనుంది. యాక్టర్ గా తన జర్నీ బాగానే ఉందని.. అవకాశాల కోసం ఎదురు చూడాల్సిన అవసరం లేకపోవడం సంతోషంగా ఉందంటోంది రాశి ఖన్నా.

అయితే నటిగా మాత్రం ఇంకా ప్రూవ్ చేసుకోవాల్సింది చాలా ఉందిట. ఓ ప్రేక్షకుడి కోణంలో తను ఆలోచిస్తానని, అలాంటప్పుడు ఇంకా చేయాల్సింది చాలానే ఉందిగా అనిపిస్తుందట. ఇలా మనసులో కోరికే కాదు.. అవి చేయగల తెగువ కూడా ఉందని బాగా నమ్మోస్తోందీ బ్యూటీ. ఇప్పటివరకూ తనలో ఉన్న వాటిలో కొన్ని కళలనే బైట పెట్టానని, ఇంకొన్ని లోపల ఉన్నాయని, వాటిని ప్రదర్శించే టైం త్వరలో వస్తుందని నమ్మకంగా చెప్పేస్తోంది రాశి ఖన్నా. రొమాంటిక్ హీరోయిన్ గా మాత్రమే కాకుండా.. పెర్ఫామెన్స్ బేస్డ్ కేరక్టర్లు కూడా చేయాలన్నది రాశి ఆలోచన. అవైతే ప్రేక్షకులకు కలకాలం గుర్తుండిపోతాయట. వచ్చామా నాలుగు సినిమాలు చేసుకుని సంపాదించుకున్నామా అన్నట్లుగా కాకుండా.. తన పేరు చెబితే ఓ ఐడెంటిటీ వచ్చేలాంటి రోల్స్ చేయాలని ఆశ పడుతున్నట్లు చెబుతోంది రాశి.

వీటిలో ఒకటి సుప్రీంలో ప్రదర్శిస్తోంది కూడా. ఇందులో అమ్మడి పాత్ర పోలీస్ కావడంతో.. ఫైటింగులు కూడా ఇరగదీసేస్తోంది. అయినా.. ఒకసారి కొడితే నలుగురైదుగురు గాల్లో ఎగిరిపోతే ఆ థ్రిల్లే వేరప్పా అంటోంది రాశి ఖన్నా.