ఎన్టీఆర్ ని ఆ సీక్రెట్ అడగాలి

ఎన్టీఆర్ త్రిపాత్రాభినయంలో కనిపించనున్న మూవీ జై లవ కుశ. ఇప్పటికే సెన్సార్ ఫార్మాలిటీస్ కూడా పూర్తి చేసుకున్న ఈ చిత్రం.. మరో 5 రోజుల్లోనే థియేటర్లలోకి వచ్చేయనుంది. ఈ సందర్భంగా టీం అంతా పబ్లిసిటీ యాక్టివిటీస్ లో ఫుల్లు బిజీగా ఉండగా.. యంగ్ టైగర్ తో తొలిసారిగా జత కట్టిన అందాల రాశీ ఖన్నా తెగ ఉత్సాహంగా ఉంది. బోలెడన్ని సినిమా కబుర్లు చెప్పేస్తోంది.

ఈ సినిమాలో ప్రియ అమ్మాయి పాత్రలో కనిపించనుందట రాశి ఖన్నా. మ్యారేజ్ బ్యూరో నడిపే ఈ చిన్నదానికి.. లవకుమార్ తో పరిచయం అయి ప్రేమగా మారుతుందని అంటోంది. కథ చెప్పినపుడే తప్పనిసరిగా చేయాలని భావించానని అంటున్న రాశి ఖన్నా.. ఎన్టీఆర్ తో అనగానే మరో ఆలోచన లేకుండానే యాక్సెప్ట్ చేసేసిందట. ఎన్టీఆర్ తో నటించడం చాలా కష్టమైన విషయమని చెబుతున్న ఈ అందాల రాశి.. తనతో సమానంగా నటించడం.. డ్యాన్స్ చేయడం సాధ్యం కాదని.. అయినా కష్టపడి మేనేజ్ చేశానని చెబుతోంది.

"ఒక పాత్రలో ఎలా ఇమిడిపోవాలో ఎన్టీఆర్ ను చూసి నేర్చుకోవాలి. మూడు పాత్రలు చేస్తున్నా సరే.. అందుకు తగ్గ హావభావాలు.. ఆహార్యం మార్చేసుకుంటాడు. గెటప్ ఛేంజ్ చేసుకున్న కొన్ని నిమిషాల్లోనే ఆ పాత్రలోకి ఒదిగిపోతాడు. ఎన్టీఆర్ ఇలా మారిపోవడం చూసి చాలా ఆశ్చర్యపోయేదాన్ని. ఇలా ఆయన ఎలా వర్క్ చేస్తున్నారనే సీక్రెట్ అడగాలని అనిపించింది" అంటోన్న రాశి ఖన్నా.. వృత్తినే దైవంగా భావించడం ఎన్టీఆర్ ను చూసి నేర్చుకోవాలని అంటోంది.

ఈ సినిమాలో ట్రింగ్ ట్రింగ్ అంటూ సాగే పాట పాడాలని భావించిందట కానీ.. ఇతర సినిమాల బిజీ కారణంగా కుదరలేదని చెప్పింది. అయితే.. ఫ్యూచర్ లో మాత్రం చాలానే సినిమాల్లో పాడుతోందట. వెంకీ అట్లూరి దర్శకత్వంలో వరుణ్ తేజ్ హీరోగా రూపొందుతున్న సినిమాలో ఓ పాట పాడుతోందట రాశి ఖన్నా. అలాగే నారా రోహిత్ పవన్ మల్లెల డైరెక్షన్ లో రూపొందే చిత్రంలో కూడా పాడుతోందట. మోహన్ లాల్ తో కలిసి నటిస్తున్న విలన్ మూవీలో టైటిల్ ట్రాక్ పాడేసిందట బ్యూటీ రాశి ఖన్నా.