ఒకే హీరోయిన్‌.. ఇద్దరు షేరింగ్‌?!

ఒకేసారి ఒకేచోట రెండు సినిమాల షూటింగులు. రెండిటిలోనూ ఒకే కథానాయిక ఆడిపాడుతోంది. ఇద్దరికీ ఎనర్జిటిక్‌ హీరోలు అన్న పేరు కూడా ఉంది. అసలింతకీ ఎవరి గురించి, ఏ సినిమాల గురించి తెలియాలంటే ఇది చదవాల్సిందే...

మాస్‌ మహారాజ్‌ రవితేజ తెలుగు ప్రేక్షకుల ముందుకు వచ్చి చాలా కాలమే అయ్యింది. పవర్‌తో హిట్‌ కొట్టాక .. కెరీర్‌ని మరో లెవల్‌కి తీసుకెళ్లాలన్న పట్టుదలతో సంపత్‌నంది దర్శకత్వంలో బెంగాళ్‌ టైగర్‌ అనే మాస్‌ మసాలా ఎంటర్‌టైనర్‌లో నటిస్తున్నాడు. ఈ సినిమా చిత్రీకరణ మెజారిటీ భాగం పూర్తయింది. ప్రస్తుతం రామోజీ ఫిలింసిటీలో కీలక సన్నివేశాల్ని చిత్రీకరిస్తున్నారు. రవితేజ, సాయాజీ షిండే, బ్రహ్మాజీలపై సన్నివేశాల్ని తెరకెక్కిస్తున్నారు. తమన్నా, రాశిఖన్నా రవితేజ సరసన కథానాయికలుగా నటిస్తున్న సంగతి తెలిసిందే. కె.కె.రాధాకృష్ణ ఈ చిత్రాన్ని నిర్మిస్తున్నారు.

ఓవైపు మాస్‌రాజా షూటింగ్‌ సాగుతుండగానే అదే రామోజీ ఫిలింసిటీలో ఎనర్జిటిక్‌ హీరో రామ్‌ హీరోగా శ్రీనివాసరెడ్డి దర్శకత్వంలోని 'శివం' తెరకెక్కుతోంది. పీటర్‌ హెయిన్స్‌ సమక్షంలో ప్రస్తుతం యాక్షన్‌ సన్నివేశాల్ని తెరకెక్కిస్తున్నారు. రామ్‌ రౌడీలపై విరుచుకుపడుతున్నాడు. సినిమాటిక్‌గా లేకుండా రియల్‌గానే పోరాట సన్నివేశాల్లో ఇరగదీస్తున్నాడు. గోడలు విరిగిపోతున్నాయ్‌. అద్దాలు పగిలిపోతున్నాయ్‌. మాస్‌ రాజా సినిమాతో పాటు .. ఈ చిత్రంలో కూడా రాశిఖన్నా కథానాయికగా నటిస్తోంది. రామ్‌ పెదనాన్న స్రవంతి రవికిషోర్‌ ఈ చిత్రాన్ని తెరకెక్కిస్తున్నారు. రెండు షూటింగుల్లోనూ ఒకటే సందడి. సందడే సందడి. అంతా రాశీ మహిమ!!