ఐష్ - దీపికా మాదిరిగా బాలీవుడ్ ని ఏలాలని చూస్తోందా..!

టాలీవుడ్ లో అడుగుపెట్టిన శాండిల్ వుడ్ బ్యూటీ రష్మిక మందన్నా.. ఇక్కడ స్టార్ హీరోయిన్ గా దూసుకుపోతోంది. ప్రస్తుతం అల్లు అర్జున్ సరసన 'పుష్ప' అనే పాన్ ఇండియా సినిమాలో నటిస్తోంది. అలానే యువ హీరో శర్వానంద్ తో 'ఆడాళ్లు మీకు జోహార్లు' అనే సినిమా చేస్తోంది. ఇటీవల కోలీవుడ్ లో కూడా ఎంట్రీ ఇచ్చి అక్కడ కూడా సక్సెస్ అందుకుంది. ఇదే క్రమంలో బాలీవుడ్ వైపు దృష్టి పెట్టింది. సిద్ధార్థ్ మల్హోత్రా సరసన 'మిష‌న్ మ‌జ్ను' అనే సినిమాలో హీరోయిన్‌ గా నటిస్తోంది. దీంతోపాటు వికాస్ భల్ దర్శకత్వంలో తెరకెక్కుతున్న 'గుడ్ బై' సినిమాలో అమితాబ్ బచ్చన్ తో కలిసి నటిస్తోంది రష్మిక. ఈ క్రమంలో అమ్మడు వరుస అవకాశాలు అందుకుని బాలీవుడ్ లో పాగా వేయాలని చేస్తున్నట్లు తెలుస్తోంది.

ఇదివరకు ఐశ్వర్యారాయ్ - దీపికా పదుకునే వంటి హీరోయిన్లు క‌న్న‌డ‌నాట నుంచి చిత్రసీమ‌కు ప‌రిచ‌య‌మై, బాలీవుడ్ నెంబ‌ర్ వ‌న్ హీరోయిన్లుగా ఎదిగారు. ఇప్పుడు వాళ్ళ మాదిరిగా తాను కూడా హిందీ పరిశ్రమను ఏలాలని ర‌ష్మిక వ్యూహాలు రచిస్తోందని స‌మాచారం. ఈ మధ్య రష్మిక ఇన్స్ట్రాగ్రామ్ ఓపెన్ చేసి చూస్తే ఈ బ్యూటీ మిగతా ఇండస్ట్రీలను వదిలి, బాలీవుడ్ వైపు ప‌రుగులు తీస్తుంద‌నే విష‌యం అర్థం అవుతుంది. ఇప్పటికే నేష‌న‌ల్ క్ర‌ష్ అంటూ ఈ లక్కీ బ్యూటీ అభిమానులు సోషల్ మీడియాలలో క్యాంపైన్ చేస్తున్నారు. మరి రాబోయే రోజుల్లో రష్మిక ప్లాన్స్ వర్కౌట్ అయి బాలీవుడ్ లో స్టార్ హీరోయిన్ అవుతుందేమో చూడాలి.