ఫోటో స్టోరీ: చందురుడిని చూసిన ఎగ్జ‌యిట్ మెంట్ లో

మ‌హేష్ క‌థ‌నాయ‌కుడిగా న‌టిస్తున్న తాజా చిత్రం `స‌రిలేరు నీకెవ్వ‌రు`. అనీల్ రావిపూడి ద‌ర్శ‌కుడు. అనీల్ సుంక‌ర‌- దిల్ రాజు నిర్మాత‌లు. ఈ చిత్రంలో మహేష్‌కు జోడిగా రష్మిక మందన్న నటిస్తోండగా.. లేడీ అమితాబ్ విజయశాంతి 13 ఏళ్ల‌ తరువాత రీ ఎంట్రీ ఇస్తున్నారు. ఆమె పాత్రకు సంబంధించిన ప్రీ లుక్ తో పాటుగా మ‌హేష్ లుక్ ని దీపావళి కానుక‌గా రిలీజ్ చేశారు. దీపావ‌ళి శుభ‌ఘ‌డియ‌లు ఆరంభ‌మైన రోజున 9 సెంటిమెంటుతో స‌రిగ్గా టైమ్ చూసి మ‌రీ రిలీజ్ చేశారు ఆ రెండు పోస్ట‌ర్లు. వాటికి అద్భుత‌మైన స్పంద‌న వ‌చ్చింది.

భార‌తి మ్యాడ‌మ్ పాత్ర‌లో విజ‌య‌శాంతి ఎంతో డిగ్నిఫైడ్ గా క‌నిపిస్తున్నార‌ని ప్ర‌శంస‌లొచ్చాయి. అలాగే బుల్లెట్టుపై రాకుమారుడిలా దిగారు మ‌హేష్ వేరొక పోస్ట‌ర్ లో. తాజాగా మ‌రో కొత్త‌ పోస్ట‌ర్ రిలీజైంది. ఈ పోస్ట‌ర్ లో ర‌ష్మిక పాత్ర‌ను ఎలివేట్ చేశారు. అందాల ర‌ష్మిక ఏదో తెలియ‌ని త‌న్మ‌య‌త్మంలో ఎగ్జ‌యిట్ మెంట్ లో ఉంది. ఆ ఉల్లాసం ఆ అంద‌మైన ముఖార‌విందంలో క‌నిపిస్తోంది. ఆ ప‌క్క‌నే చెలిక‌త్తెలు ఏదో చెవిలో గుస‌గుస‌లాడేస్తున్నారు. ఈ మొత్తం స‌న్నివేశం చూస్తుంటే ఎంతో ఆస‌క్తిని రేకెత్తిస్తోంది.

లంగా వోణీ .. పాపిడి బొట్టు.. కాటుక క‌ళ్లు.. మెడ‌లో హారం.. ముదురు రంగు ప‌సుపు ప‌చ్చ కోక‌కు త‌గ్గ‌ట్టే కాంబినేష‌న్ గాజులు.. ఆ అలంక‌ర‌ణే.. అబ్బ‌బ్బో అని పొగిడేయాల్సిందే. ర‌ష్మిక‌లో ఎగ్జ‌యిట్ మెంట్ లో విప్పారిన ఆ క‌ళ్లు.. విర‌జాజిలా విచ్చిన ఆ పెద‌వులు.. తుళ్లింత చూశాక దీపావ‌ళి ధ‌న‌ల‌క్ష్మి నేరుగా తెలుగింటి లోగిళ్ల‌లోకి వ‌చ్చిన‌ట్టే క‌నిపిస్తోంది. 12 జ‌న‌వ‌రి 2020 అస‌లైన ట్రీట్ ఉంటుంది. అంత‌వ‌ర‌కూ జ‌స్ట్ వెయిట్.