ఏఏ 20లో రష్మిక ఫిక్స్

`ఛలో` చిత్రంతో టాలీవుడ్ లో అడుగుపెట్టి తొలి ప్రయత్నమే బ్లాక్ బస్టర్ హిట్ అందుకుంది కన్నడ బ్యూటీ రష్మిక. ఆ వెంటనే `గీత గోవిందం` రూపంలో సెన్సేషనల్ హిట్ ని తన ఖాతాలో వేసుకుంది. రెండు వరస విజయాలతో రష్మిక రేంజ్ స్కైని టచ్ చేసింది. ప్రస్తుతం ఈ అమ్మడు విజయ్ దేవరకొండ సరసన `డియర్ కామ్రేడ్` అనే చిత్రంలో నటిస్తోంది. టాలీవుడ్ లో వరుస ఆఫర్లతో ఈ అమ్మడు ఉక్కిరి బిక్కిరి అవుతోంది. అంతేకాదు కేవలం రెండే రెండేళ్లలో స్టార్ హీరోయిన్ల జాబితాలో చేరిపోతూ కాంపిటీటర్లకు బిగ్ షాక్ నిస్తోంది.

మల్లూ భామల హవా సాగే టాలీవుడ్ లో కన్నడ రంగం నుంచి వచ్చి సత్తా చాటుతున్న భామగా రష్మిక పేరు మార్మోగిపోతోంది. రష్మిక మందన లైనప్ ఏ ఇతర సమకాలీన స్టార్ హీరోయిన్ కి తీసికట్టుగా లేదిప్పుడు. అంతకంతకు రేంజ్ అసాధారణంగా పెరుగుతోంది. తాజా సమాచారం ప్రకారం.. అల్లు అర్జున్ .. సుకుమార్ కాంబినేషన్ లో తెరకెక్కనున్న భారీ చిత్రంలో రష్మిక మందన కథానాయికగా ఎంపికైందని తెలుస్తోంది. ఆ సంగతిని రష్మిక స్వయంగా బన్ని బర్త్ డే వేళ అభిమానులకు రివీల్ చేసింది. అల్లు అర్జున్ కెరీర్ ల్యాండ్ మార్క్ 20వ సినిమా (ఏఏ20)లో రష్మిక అవకాశం దక్కించుకుంది. ఈ చిత్రాన్ని ప్రఖ్యాత మైత్రి మూవీ మేకర్స్ సంస్థ నిర్మించనుంది.

రష్మిక ప్రస్తుతం యంగ్ హీరో నితిన్ సరసన భీష్మ అనే చిత్రంలో కథానాయికగా నటిస్తున్న సంగతి తెలిసిందే. భీష్మ తొందర్లోనే రిలీజ్ కి రానుందని తెలుస్తోంది. అటు తమిళంలోనూ క్రేజీ హీరో కార్తీ సరసన రష్మిక అవకాశం అందుకుంది. మరోవైపు సూపర్ స్టార్ మహేష్ సరసన నటింపజేసేందుకు సంప్రదింపులు జరుగుతున్నాయని తెలుస్తోంది. అటువైపు యు.వి.క్రియేషన్స్ నిర్మించే సినిమాలకు రష్మిక పేరు పరిశీలనలో ఉందన్న మాటా వినిపిస్తోంది.