రష్మికకు బాలీవుడ్ ఛాన్స్ వచ్చిందా?

బెంగుళూరు బ్యూటీ.. తెలుగు ప్రేక్షకులకు గీతా మేడమ్ గా మారిపోయిన రష్మిక మందన్న ఇప్పుడు టాలీవుడ్ లో మాత్రమే కాదు సౌత్ లోనే ఒక క్రేజీ హీరోయిన్. ఈమధ్య రష్మికకు ఒక క్రేజీ బాలీవుడ్ ప్రాజెక్ట్ లో ఆఫర్ వచ్చిందని వార్తలు వచ్చాయి. సంజయ్ లీలా భన్సాలి దర్శకత్వంలో రణదీప్ హూడా హీరోగా తెరకెక్కనున్న ఆ చిత్రంలో ఒక కీలక పాత్రకు రష్మికను ఫైనలైజ్ చేశారని అన్నారు.

కానీ ఆ ఆఫర్ తో సంజయ్ లీలా భన్సాలి టీమ్ రష్మికను సంప్రదించిన మాట నిజమే కానీ రష్మిక ఆ సినిమాకు ఎంపిక కాలేదట. కారణాలు ఇంకా తెలీదు కానీ ప్రస్తుతానికైతే గీతా మేడమ్ కు ఆ బాలీవుడ్ సినిమా లేనట్టే. బాలీవుడ్ లో ఉండే టాప్ ఫిలిం మేకర్స్ లో సంజయ్ లీలా భన్సాలి ఒకరు. భారీ బడ్జెట్ తో తెరకెక్కే ఆయన సినిమాలు బాక్స్ ఆఫిస్ దగ్గర సంచలనం సృష్టిస్తూ ఉంటాయి. ఆయన దర్శకత్వం వహించిన లాస్ట్ సినిమా 'పద్మావత్' సూపర్ హిట్ గా నిలిచిన సంగతి తెలిసిందే. భన్సాలి సినిమాలో ఆఫర్ వచ్చి ఉంటే రష్మిక టాలెంట్ హిందీవారికి కూడా తెలిసిపోయి ఉండేది. పాపం ఛాన్స్ మిస్. రష్మిక కు కాదు.. హిందీ ఆడియన్స్ కు!

ఇదిలా ఉంటే సౌత్ లో మాత్రం అమ్మడి లిస్టులో క్రేజీ ప్రాజెక్టులు ఉన్నాయి. విజయ్ దేవరకొండ 'డియర్ కామ్రేడ్'.. నితిన్ సినిమా 'భీష్మ'.. అల్లు అర్జున్-సుకుమార్ ప్రాజెక్ట్.. తమిళం లో కార్తి సినిమా. ఇవే కాకుండా ఇంకా కొన్ని చర్చల దశలో కూడా ఉన్నాయట.