ఇంత‌వ‌ర‌కూ దాచిన‌ది ఒక‌టి ఓపెనైన‌ ర‌ష్మిక‌

కన్నడ బ్యూటీ రష్మిక మందన్న టాలీవుడ్ లో అనతికాలంలోనే అసాధార‌ణ‌ ఖ్యాతిని ఆర్జించి శిఖ‌రాగ్రానికి చేరుకుంది. 2కోట్లు పారితోషికం అందుకునే ట్యాలెంటెడ్ బ్యూటీగా పాపుల‌రైంది. ప్ర‌స్తుతం తెలుగు-హిందీలో వ‌రుస సినిమాలు చేస్తోంది. ఇప్పుడు బాలీవుడ్ ప్రాజెక్ట్ లతో బిజీగా ఉంది. దీపం ఉండ‌గానే.. తన కెరీర్ ని బాగా బ్యాలెన్స్ చేసుకుంటోంది. భారీ బడ్జెట్ ప్రాజెక్ట్ లకు సైన్ చేస్తూనే న‌ట‌న‌కు ఆస్కారం ఉన్న‌వాటిని వెతుకుతోంది.

అల్లు అర్జున్ చిత్రం పుష్పలో రష్మిక డి-గ్లామరస్ పాత్రను పోషించింది. శ్రీ‌వల్లి అనే విలేజ్ అమ్మాయిగా క‌నిపించ‌నుంది. ట్రైల‌ర్ విడుదలకు ముందు ర‌ష్మిక‌ మీడియాతో ముచ్చటించింది. అంతేకాదు.. నేషనల్ క్రష్ అన్న పిలుపు గురించి ప్ర‌స్థావిస్తే దానిపై మాట్లాడింది.

గూగుల్ రష్మికను నేషనల్ క్రష్ గా ప్రకటించడంపై విలేకరులు ఆమెను అడిగారు. ``నా అభిమానులే నా పెద్ద బలం. వారి వల్లనే నేను ఈ స్థాయిలో ఉన్నాను. గూగుల్ కి నా గురించి తెలియదు. నా అభిమానులే దీన్ని సాధ్యం చేసార‌ని నేను అనుకుంటున్నాను. నన్ను నేషనల్ క్రష్ అని పిలవడం ఆనందంగా ఉంది`` అని రష్మిక అన్నారు.

అల్లు అర్జున్ పైనా ర‌ష్మిక పొగ‌డ్త‌ల వ‌ర్షం కురిపించింది. ప్యాక్డ్ ఎనర్జిటిక్ స్టార్ అని అభివర్ణించింది. అతను సెట్ లో ఎప్పుడూ స్టార్ లా ప్రవర్తించలేదని వారి మధ్య మంచి బంధం ఉందని కూడా ఆమె చెప్పింది. మారేడుమిల్లి అడవుల్లో పుష్ప కోసం షూటింగ్ చేసినప్పుడు చాలా కష్టపడాల్సి వచ్చిందని రష్మిక తెలిపింది. డిసెంబర్ 17న పుష్ప విడుదలవుతోంది. తెలుగు-త‌మిళం-క‌న్న‌డం-మ‌ల‌యాళం-హిందీలో అత్యంత భారీగా విడుద‌ల‌వుతోంది. రిజ‌ల్ట్ కోసం ర‌ష్మిక ఆస‌క్తిగా వేచి చూస్తోంది.