వారికి మొహం చాటేస్తున్న రష్మిక

'ఛలో' చిత్రంతో గుర్తింపు దక్కించుకున్న కన్నడ బ్యూటీ రష్మిక మందన్న 'గీత గోవిందం' చిత్రంతో బ్లాక్‌ బస్టర్‌ హీరోయిన్‌ గా మారిపోయింది. ఆ చిత్రంలో విజయ్‌ దేవరకొండతో కలిసి ఈమె చేసిన రొమాన్స్‌ మరియు లవ్‌ సీన్స్‌ యూత్‌ ఆడియన్స్‌ కు బాగా కనెక్ట్‌ అయ్యాయి. అందుకే విజయ్‌ దేవరకొండతో పాటు రష్మికకు కూడా మంచి పేరు వచ్చింది. గీత గోవిందంతో రష్మికతో చిన్నా పెద్దా అనే తేడా లేకుండా పలువురు హీరోలు నటించేందుకు ఆసక్తిగా ఉన్నారు.

ఇప్పటికే రష్మిక తెలుగులో స్టార్‌ హీరోలు ఇద్దరి ముగ్గురితో కమిట్‌ అయ్యింది. ఈ సమయంలోనే ఈమె తమిళం మరియు కన్నడంలో కూడా నటిస్తోంది. తెలుగులో ఈమెను తమ సినిమాల్లో నటింపజేసేందుకు కోట్ల రూపాయల పారితోషికం ఇచ్చేందుకు సైతం సిద్దం అవుతున్నారు. కాని రష్మిక మాత్రం చిన్న హీరోలతో నటించేందుకు ఆసక్తి చూపడం లేదు. ఒక వేళ ఎవరైనా డేట్ల కోసం ప్రయత్నించినా కూడా వారికి ఈమె మొహం చాటేస్తున్నట్లుగా ఇండస్ట్రీలో టాక్‌ నడుస్తోంది.

త్వరలో ఈమె మరోసారి విజయ్‌ దేవరకొండతో కలిసి 'డియర్‌ కామ్రేడ్‌' చిత్రంతో ప్రేక్షకుల ముందుకు రాబోతుంది. ఆ చిత్రం తర్వాత మహేష్‌ బాబు మరియు అల్లు అరవింద్‌ ల సినిమాలు కూడా ఈమె చేస్తోంది. ఈ మూడు సినిమాలతో తన స్టార్‌ డం మరింత పెరుగుతుందని, అప్పుడు చాలా కాలం పాటు స్టార్‌ గా ఇండస్ట్రీలో కొనసాగించే అవకాశం ఉంటుందని రష్మిక భావిస్తున్నట్లుగా అనిపిస్తుంది. వచ్చిన ప్రతి ఒక్క ఆఫర్‌ కు కమిట్‌ అయ్యి కొంత కాలంకే కనుమరుగయ్యే కన్నా మెల్ల మెల్లగా సినిమాలు చేస్తూ ఎక్కువ కాలం ఇండస్ట్రీలో ఉండాలనేది రష్మిక ఆలోచనగా తెలుస్తోంది.