ముంబైలో సొంత అపార్ట్ మెంట్ కి షిఫ్ట‌యిన ర‌ష్మిక‌

తెలుగులో అగ్ర క‌థానాయిక‌గా వెలుగుతున్న ర‌ష్మిక మంద‌న అటు బాలీవుడ్ లోనూ బ్యాక్ టు బ్యాక్ ఆఫ‌ర్లు అందుకున్న సంగ‌తి తెలిసిందే. సిద్ధార్థ్ మ‌ల్హోత్రా స‌ర‌స‌న స్పై థ్రిల్లర్ `మిషన్ మజ్ను`లో న‌టిస్తోంది. అమితాబ్ బచ్చన్ `గుడ్ బాయ్`లోనూ కీల‌క పాత్ర‌ను పోషిస్తోంది. మ‌రో రెండు హిందీ చిత్రాల‌కు సంత‌కాలు చేసింది. తెలుగులో పుష్ప‌.. ఆడాళ్లు మీకు జోహార్లు లాంటి ప‌లు క్రేజీ చిత్రాల్లో నాయిక‌గా న‌టిస్తోంది.

హిందీ ప‌రిశ్ర‌మ‌లో కెరీర్ ని దృష్టిలో పెట్టుకుని ఇటీవ‌లే ముంబైలో ఓ అపార్ట్ మెంట్ ను ర‌ష్మిక‌ కొనుక్కుంది. తాజాగా ఈ బ్యూటీ త‌న సొంత అపార్ట్ మెంట్ లోకి షిఫ్ట‌య్యింది. ఇదే విష‌యాన్ని తన అభిమానుల కోసం ఇన్ స్టాలో షేర్ చేసింది.

``ఎట్ట‌కేల‌కు ఈ రోజు నా అపార్ట్ మెంట్ లోకి మారిపోయాను! చాలా వస్తువులను షాపింగ్ చేయాల్సి వచ్చింది…ఇది ఎప్పటికీ అంతం కాని ఖర్చు.. రోజంతా అయిపోయింది.. నా స్నేహితులను కలుసుకోవలసి వచ్చింది. అవ‌స‌ర‌మైన‌ కొనుగోలులో నా అసిస్టెంట్ సాయి స‌హాయ‌పడింది. ఆరా(ప‌ప్పీ) నేను చాలా అలసటతో ఉన్నా దానిని అధిగమించాం..`` అని తెలిపింది. మొత్తానికి ముంబైలో ర‌ష్మిక సెటిలైన‌ట్టేన‌ని అర్థ‌మ‌వుతోంది. బాలీవుడ్ కి తొలి ప్రాధాన్య‌త‌నిస్తూ తెలుగులోనూ అడ‌పాద‌డ‌పా న‌టిస్తుందేమో!!