కేజీఎఫ్ లో లేడీ ప్రైమ్ మినిస్టర్

కన్నడ స్టార్ యష్ హీరోగా తెరకెక్కిన 'కేజీఎఫ్: చాప్టర్ 1' ఘన విజయం సాధించడంతో 'కేజీఎఫ్: చాప్టర్ 2' పై అంచనాలు భారీగా పెరిగిన సంగతి తెలిసిందే. మొదటి భాగం ప్యాన్ ఇండియా లెవెల్ లో ప్రేక్షకులను మెప్పించడంతో చాప్టర్ 2 ను మరింత భారీగా రూపొందిస్తున్నారు. ప్యాన్ ఇండియా టచ్ ఇచ్చేలా నటీనటులను ఎంపిక చేసుకున్నారు. తాజా సమాచారం ప్రకారం ఈ సినిమా కోసం సీనియర్ బాలీవుడ్ హీరోయిన్ రవీనా టాండన్ ను తీసుకున్నారట.

ఈ చిత్రంలో భారత దేశ మాజీ ప్రధాన మంత్రి ఇందిరా గాంధీ పాత్ర ఉందట. ఐరన్ లేడీ ఇందిర పాత్రలోనే రవీనా టాండన్ కనిపిస్తుందట. ప్రస్తుతం రవీనా పెద్దగా సినిమాలలో నటించడం లేదు కానీ ఒక పదిహేనేళ్ళ క్రితం స్టార్ హీరోల సినిమాల్లో హీరోయిన్ గా నటించింది. ఆమె ఖాతాలో ఎన్నో సూపర్ హిట్ సినిమాలు ఉన్నాయి. రవీనా ఎంట్రీతో ఈ సినిమాకు బాలీవుడ్ లో క్రేజ్ పెరగడం ఖాయమే.

ప్రశాంత్ నీల్ దర్శకత్వంలో తెరకెక్కుతున్న ఈ కన్నడ సినిమాలో సౌత్ కు చెందిన ఇతర భాషా నటులను కూడా తీసుకున్నారు. తెలుగు నటుడు రావు రమేష్ ఈ చిత్రంలో ఒక కీలకపాత్ర పోషిస్తున్నాడట. ప్రస్తుతం ఈ సినిమా షూటింగ్ శరవేగంగా సాగుతోంది.