అదుగో.. ఇప్పటికి మోక్షం

విభిన్న చిత్రాల దర్శకుడిగా పేరు దక్కించుకున్న రవిబాబు గత రెండు సంవత్సరాలుగా చేస్తున్న చిత్రం ‘అదుగో’. పంది పిల్ల చుట్టు కథ తిరుగుతుందని, ఈ చిత్రంలో పంది పిల్లది కీలక పాత్ర అంటూ మొదటి నుండి రవిబాబు చెబుతూ వస్తున్నాడు. ఈ చిత్రం కోసం రవిబాబు ఏకంగా పంది పిల్లలను పెంచుకున్న విషయం తెల్సిందే. గత నెలలో ఈ చిత్రాన్ని దసరాకు విడుదల చేయబోతున్నట్లుగా రవిబాబు ప్రకటించాడు. దసరా విడుదలకు అన్ని ఏర్పాట్లు చేస్తున్నామంటూ ట్రైలర్‌ కూడా విడుదల చేసిన రవిబాబు చివరి నిమిషంలో ఏమనుకున్నాడో కాని విడుదల వాయిదా వేశాడు.

‘అదుగో’ చిత్రంలో రియల్‌ పంది పిల్లను వాడటంతో పాటు, ఎక్కువ సీన్స్‌ లో సీజీ తో మ్యానేజ్‌ చేసినట్లుగా సమాచారం. అందుకే గ్రాఫిక్స్‌ వర్క్‌ కు రవిబాబు ఎక్కువ టైం తీసుకుంటున్నట్లుగా తెలుస్తోంది. దసరాకు విడుదల అనుకున్నా కూడా అప్పటికి గ్రాఫిక్స్‌ వర్క్‌ పూర్తి కానందున సినిమాను వాయిదా వేసినట్లుగా సినీ వర్గాల ద్వారా తెలుస్తోంది. ఇప్పుడు పక్కా ప్రణాళికతో ఈ చిత్రాన్ని దీపావళి కానుకగా నవంబర్‌ 7న విడుదల చేసేందుకు రవిబాబు సన్నాహాలు చేస్తున్నాడు.

ఈ చిత్రాన్ని రవిబాబుతో కలిసి సురేష్‌ బాబు నిర్మించాడు. ఈ చిత్రంలో అంతా కొత్త వారు కనిపించబోతున్నట్లుగా ట్రైలర్‌ చూస్తే అనిపిస్తుంది. దీపావళికి బాక్సాఫీస్‌ వద్ద చాలా సినిమాలు పోటీ పడుతున్నాయి. అయినా కూడా పందిపిల్ల చేసే కామెడీకి ప్రేక్షకులు నిరాజనాలు పడతారనే నమ్మకంతో రవిబాబు దీపావళికే సినిమాను విడుదల చేయాని భావిస్తున్నట్లుగా తెలుస్తోంది. రవిబాబు గత చిత్రం ‘అవును 2’ చిత్రం ఆశించిన స్థాయిలో ఫలితాన్ని దక్కించుకోలేక పోయింది. దాంతో కాస్త ఎక్కువ శ్రద్ద పెట్టి రవిబాబు ఈ చిత్రాన్ని చేసినట్లుగా తెలుస్తోంది. మరి రవిబాబుకు అదుగో ఎలాంటి ఫలితాన్ని ఇస్తుందో చూడాలి.