రవిబాబు కరోనా కేక్‌ తో క్వారెంటైన్‌ యానివర్శరీ

టాలీవుడ్‌ లో రవిబాబు చేసినవి కొన్ని సినిమాలే అయినా.. దర్శకుడిగా నటుడిగా తనదైన ముద్రను వేశాడు అనడంలో ఎలాంటి సందేహం లేదు. విభిన్నమైన సినిమాలను తెరకెక్కించి తెలుగు ప్రేక్షకులకు కొత్త అనుభూతిని కలిగించిన దర్శకుడు ఏం చేసినా కూడా విభిన్నంగానే ఉంటుంది. ఆయన తాజాగా మాస్క్‌ ల కొరతను అధిగమించేందుకు కాలుకు వేసుకునే సాక్స్‌ లను ముక్కుకు పెట్టుకుని మాస్క్‌ మాధిరిగా వాడుకోవాలంటూ సూచించాడు.

సాక్స్‌ ను మాస్క్‌ మాదిరిగా ఎలా తయారు చేసుకోవాలనే విషయాన్ని కూడా రవిబాబు క్లీయర్‌ గా వివరించి మరీ చెప్పాడు. ఆ వీడియో అందరి దృష్టిని ఆకర్షించింది. ఇప్పుడు మరో వీడియోతో రవిబాబు సోషల్‌ మీడియాలో వైరల్‌ అవుతున్నాడు. కరోనా వైరస్‌ కారణంగా లాక్‌ డౌన్‌ విధించడంతో జనాలు అంతా కూడా ఇంట్లోనే క్వారెంటైన్‌ అవ్వాల్సి వచ్చింది. తాజాగా రవిబాబు క్వారెంటైన్‌ యానివర్శిరీని జరుపుకున్నాడు. ఇంట్లోనే ఉంటూ ఉన్న రవిబాబు కరోనా వైరస్‌ తరహా కేసుతో యానివర్శిరీని ఫన్నీగా తండ్రితో కలిసి జరుపుకున్నాడు. వీడియోలో రవిబాబు ఏడుస్తూ ఉండగా ఆయన తండ్రి చలపతి రావు వస్తాడు.

ఏమైందని చూస్తూ ఉండగా రవిబాబు కింద ఉన్న క్యాండిల్‌ ను ఊదేసి కరోనా కేకును తీసుకుని తాను నోట్లో పెట్టుకుని తండ్రికి కూడా తినిపించబోయాడు. ఖర్మరా బాబు అనుకుంటూ తల కొట్టుకుని చలపతి రావు అక్కడ నుండి వెళ్లి పోతాడు. ఫన్నీగా ఉన్న వీడియో ప్రస్తుతం నెట్టింట వైరల్‌ అవుతోంది. డైలాగ్స్‌ లేకుండా కేవలం ఎక్స్‌ ప్రెషన్స్‌ తో కాన్సెప్ట్‌ తో రవిబాబు నవ్వు తెప్పించడంతో పాటు ప్రస్తుత పరిస్థితిని కళ్లకు కట్టినట్లుగా చూపించాడు.