4 నెలల్లో షూటింగ్.. రెండేళ్లు పోస్ట్ ప్రొడక్షన్

మొత్తానికి విలక్షణ దర్శకుడు రవిబాబు చాలా కాలం తర్వాత తన కొత్త సినిమాను ప్రేక్షకుల ముందుకు తేబోతున్నాడు. అతను రూపొందించిన ‘అదుగో’ మళ్లీ వార్తల్లోకొచ్చింది. కొన్ని రోజుల కిందటే టీజర్ లాంచ్ చేసిన రవిబాబు.. ఇప్పుడు ట్రైలర్ తో పలకరించాడు. వినాయక చవితి కానుకగా ఈ చిత్ర ట్రైలర్ ఈ రోజే రిలీజ్ చేశారు. అది రవిబాబు స్టయిల్లోనే చాలా వినోదాత్మకంగా సాగి ఆకట్టుకుంది. ఇందులో పంది పిల్ల విన్యాసాల గురించి ఎంత చెప్పినా తక్కువే. సూపర్ స్టార్ బంటీ అంటూ ఈ పాత్రను పరిచయం చేశారు. నిజంగా అది సూపర్ స్టార్ విన్యాసాలే చేసింది. రౌడీల నుంచి తప్పించుకోవడం.. వాళ్లతో ఫైట్ చేయడం.. నృత్యాలు చేయడం.. అబ్బో ఇలా చాలా విన్యాసాలే చూపించారు ట్రైలర్లో. కామెడీ.. యాక్షన్ తో పాటు ఎమోషన్లకు లోటు లేనట్లే ఉంది సినిమాలో.

‘అదుగో’ చిన్న స్థాయి సినిమాలాగే కనిపిస్తోంది కానీ.. పంది పిల్లతో విన్యాసాలు చేయించడానికి రవిబాబు అండ్ టీమ్ చాలానే కష్టపడ్డట్లుంది. విజువల్ ఎఫెక్ట్స్ కోసం ఎంతో సమయం.. భారీ ఖర్చు వెచ్చించారట. నిజానికి ఈ చిత్ర షూటింగ్ కేవలం 4 నెలల వ్యవధిలోనే పూర్తయిందట. కేవలం పోస్ట్ ప్రొడక్షన్ పనుల కోసమే రెండేళ్ల సమయం పట్టిందట. ఔట్ పుట్ విషయంలో రాజీ పడని రవిబాబు.. తాను కోరుకున్న విధంగా ఎఫెక్ట్స్ వచ్చే వరకు ఓపిగ్గా ఉన్నాడట. బడ్జెట్లో సగానికి పైగా వీఎఫెక్స్ కోసమే పెట్టినట్లు సమాచారం. ఇంతకుముందు రవిబాబుతో ‘అవును’.. ‘అవును-2’ సినిమాలు తీసి మంచి ఆదాయం అందుకున్న సురేష్ బాబు.. ఈసారి సినిమా మార్కెట్ స్థాయికి మించే ఖర్చు చేసినట్లు తెలుస్తోంది. ఈ సినిమా రిలీజ్ డేట్ ఇది అంటూ కచ్చితంగా చెప్పలేదు కానీ.. దసరా కానుకగా సినిమా థియేటర్లలోకి దిగుతుందని మాత్రంట్రైలర్లో ప్రకటించారు.