ఓటీటీలోకి 'క్రష్'.. అడల్ట్ పోస్టర్ తో రచ్చ లేపిన రవిబాబు..!

విభిన్నమైన చిత్రాలతో తనకంటూ ప్రత్యేకమైన గుర్తింపు తెచ్చుకున్న దర్శకుడు రవిబాబు. గత కొన్నేళ్లుగా సక్సెస్ కోసం ఎదురుచూస్తున్న ఆయన.. ఇప్పుడు ''క్రష్'' అనే యూత్ ఫుల్ రొమాంటిక్ కామెడీ ఎంటర్టైనర్ తో ప్రేక్షకుల ముందుకు వస్తున్నారు. తన హోమ్ బ్యానర్ ఫ్లైయింగ్ ఫ్రాగ్స్ ప్రొడక్షన్స్ పైనే ఈ చిత్రాన్ని నిర్మించాడు. ఇప్పటికే విడుదలైన ప్రచార చిత్రాలు - ఫస్ట్ పీప్ టీజర్ తో ఈ సినిమా ఎలాంటి కంటెంట్ తో రాబోతుందో హింట్ ఇచ్చారు.

టీనేజ్‌ యువతలోని కోరికలు.. ప్రస్తుతం యువతరం ఆలోచనలు 'క్రష్' చిత్రంలో చూపించే ప్రయత్నం చేస్తున్నారు రవిబాబు. ఈ క్రమంలో టీనేజ్‌ సెక్స్.. వారిలో కలిగే ఫీలింగ్స్ అంటూ డబుల్‌ మీనింగ్‌ డైలాగ్స్ తో సెక్స్ ఎడ్యుకేషన్ గురించి చెప్పబోతున్నాడు. ఇప్పటి వరకు వదిలిన ప్రమోషనల్ కంటెంట్ ని బట్టి చూస్తేనే ఇది డిజిటల్ ఫ్లాట్ ఫార్మ్స్ లో విడుదలయ్యే సినిమా అని అందరూ ఫిక్స్ అయ్యారు. దీన్నే నిజం చేస్తూ 'క్రష్' చిత్రాన్ని డైరెక్ట్ ఓటీటీలో రిలీజ్ చేస్తున్నట్లు అధికారికంగా ప్రకటించారు.

జీ5 ఓటీటీలో 'క్రష్' సినిమాని జులై 9వ తేదీన స్ట్రీమింగ్ కి పెడుతున్నట్లు వెల్లడించారు. ఈ అనౌన్స్ మెంట్ సందర్భంగా మరో అడల్ట్ పోస్టర్ ని వదిలారు. నగ్నంగా ఉన్న మూడు జంటలు ఒక దుప్పటి అడ్డం పెట్టుకొని ఒకరినొకరు కౌగిలించుకుని ఉన్నారు. ఈ పోస్టర్ తో ఓటీటీలో ఈ సినిమా రచ్చ ఏ రేంజ్ లో ఉండబోతుందో రవిబాబు మరోసారి గుర్తు చేశారు. ఈ చిత్రంలో అభయ్ సింహా - కృష్ణ బూరుగుల - చరణ్ సాయి - అంకిత మనోజ్ - పర్రీ పాండే - శ్రీ సుధారెడ్డి తదితరులు ప్రధాన పాత్రల్లో నటించారు.