ఫ్రీక్ అవుట్.. హంగామా చేస్తున్న డిస్కోరాజా

మాస్ మహారాజా రవితేజ హీరోగా వీఐ ఆనంద్ దర్శకత్వంలో తెరకెక్కుతున్న సైఫై యాక్షన్ ఫిలిం 'డిస్కోరాజా'. ఈ సినిమా జనవరి 24 న విడుదలకు సిద్ధం అవుతోంది. ఈ సినిమా నుండి ఇప్పటికే లిరికల్ సాంగ్స్.. టీజర్లు విడుదల చేసిన 'డిస్కోరాజా' టీమ్ తాజాగా 'ఫ్రీక్ అవుట్' అంటూ సాగే వీడియో సాంగ్ ను రిలీజ్ చేసింది.

రెగ్యులర్ పాటల తరహాలో కాకుండా పల్లవి.. అనుపల్లవి.. చరణాలు లేకుండా ఒక బ్యాక్ గ్రౌండ్ స్కోర్ కు మాటలు జోడించారు. ఫ్రీక్ అవుట్ ట్యూన్ విభిన్నంగా ట్రెండీగా ఉంది. పాట ప్రారంభంలోనే రవితేజ రౌడీలను చితక్కొడుతూ 'రాజ్ డిస్కో రాజ్' అంటూ సూటు బూటు ధరించి.. చేతిలో సిగార్ తో ఒక స్టైలిష్ ఎంట్రీ ఇస్తారు. 'ఫ్రీక్ అవుట్.. ఫ్రీక్ అవుట్' అంటూ రౌడీలు తనకు గన్స్ గురిపెట్టినా పట్టించుకోకుండా డోంట్ కేర్ అన్నట్టుగా స్టెప్స్ వేస్తూ రజనీకాంత్ స్టైల్ లో రెప్పపాటులో మాయ చేసి ఆ గన్స్ ను వారికి గురి పెడతాడు. ఇలానే స్టైలిష్ సీన్స్ లో పాట సాగుతుంది.

రవితేజ ప్రతి ఫ్రేమ్ లోను సూపర్ స్టైలిష్ గా ఉన్నారు. మొదట్లో ఈ తరం వ్యక్తిగా కనిపించిన రవితేజ... బాబీ సింహా పాట మధ్యలో రెట్రో స్టైల్ లో కనిపిస్తారు. ఇంగ్లీష్ తో పాటు తమిళం.. తెలుగు డైలాగ్స్ కూడా ఉన్నాయి. 'ఏంటి.. నీకు కామసూత్రతోనే కాంపిటీషనా?' అనే సునీల్ పంచ్ అదిరిపోయింది. 'డిస్కోరాజా' టీజర్ల లాగా ఈ పాట కూడా సినిమా పై ఆసక్తిని పెంచుతోంది.. ఆలస్యం ఎందుకు మీరు కూడా ఫ్రీక్ అవుట్ అయిపోండి.