మావాడు ఫోజులు కొట్టేస్తున్నాడంతే

దాదాపు రెండేళ్ల గ్యాప్ తర్వాత మాస్ మహారాజా రవితేజ సినిమా రాజా ది గ్రేట్ ప్రేక్షకుల ముందుకొచ్చింది. కెరీర్ లో తొలిసారి అంధుడి పాత్ర పోషించినా తనకు కలిసొచ్చిన కామెడీతో ప్రేక్షకులను నవ్వించి ఆనందాన్ని తన ఖాతాలో వేసుకున్నాడు. వరస ఫ్లాపులు.. లాంగ్ గ్యాప్ తర్వాత రిలీఫ్‌ ఇచ్చే సినిమా దక్కడం రవితేజకు ఆనందాన్నిస్తే... ఇదే సినిమాలో తన కొడుకు వెండితెరపై కనిపించి మెప్పించడం మాస్ మహారాజా ఆనందాన్ని రెట్టింపు చేసింది.

అనిల్ రావిపూడి దర్శకత్వంలో వచ్చిన రాజా ది గ్రేట్ సినిమాలో రవితేజ చిన్నప్పటి పాత్రలో అతడి కొడుకు మహాధన్ కనిపించాడు. అతడి పాత్రకు మంచిపేరు రావడంతో రవితేజ ముఖంలో పుత్రోత్సాహం బాగా కనిపిస్తోంది. ఇదే విషయం తన మాటల్లోనూ కనిపించింది. ‘‘రాజా ది గ్రేట్ మూవీ హిట్ కావడం యూనిట్ అందరికీ సంతోషాన్ని ఇచ్చింది. సక్సెస్ తో వచ్చే గుర్తింపు ఇలాగే ఉంటుంది. ఇప్పుడు మా అబ్బాయి ఫోన్ కు చాలా మెసేజ్ లు వస్తున్నాయి. అవి చూసి వాడు చాలా ఆనందపడిపోతున్నాడు. ఆఖరుకు నా ముందే ఫోజులు కొట్టేస్తున్నాడు’’ అంటూ ఆనందంగా చెబుతున్నాడు.

రాజా ది గ్రేట్ తర్వాత రవితేజ టచ్ చేసి చూడు సినిమా చేస్తున్నాడు. కొత్త డైరెక్టర్ విక్రమ్ సిరికొండ దర్శకత్వంలో వస్తున్న ఈ సినిమాలో రాశీ ఖన్నా - సీరత్ కపూర్ హీరోయిన్లు గా నటిస్తున్నారు. ఈ సినిమా షూటింగ్ చాలావరకు పూర్తయింది.