సంక్రాంతి పోస్ట‌ర్ లోనే సినిమా చూపించేశాడు!

మాస్ మ‌హారాజా ర‌వితేజ క‌థానాయ‌కుడిగా గోపీచంద్ మ‌లినేని ద‌ర్శ‌క‌త్వంలో తెర‌కెక్కుతున్న క్రాక్ ఇప్ప‌టికే పోస్ట‌ర్ల‌తో హీట్ పెంచుతోంది. ఇందులో రవితేజ కాప్ పాత్ర‌లో న‌టిస్తున్నాడు. మాస్ మ‌హారాజా కాప్ లుక్ కి అభిమానులు ఫిదా అయ్యారు. ఇదో రియ‌లిస్టిక్ స్టోరి... గోపీ శైలికి భిన్న‌మైన క‌థ‌తో తెర‌కెక్కిస్తున్నారు అంటూ ప్ర‌చార‌మైంది. అలాగే ప‌క్కా క‌మ‌ర్శియ‌ల్ ఎంట‌ర్ టైన‌ర్ గా తెర‌కెక్కిస్తున్నార‌ని స‌మాచారం. తాజాగా సంక్రాంతి కానుక‌గా మ‌రో కొత్త పోస్ట‌ర్ ని రిలీజ్ చేసింది చిత్ర‌యూనిట్. ఇందులో రాజాని ఫ్యామిలీ మేన్ త‌ర‌హా లుక్ ని ఎలివేట్ చేసారు.

భార్య పిల్ల‌ల‌తో సంక్రాంతికి బండిపై అత్తారింటికి వెళుతున్న లుక్ ని పోస్ట‌ర్ లో వేశారు. బైక్ ట్యాంక్ పై బుడ్డోడు... బైక్ డ్రైవ్ చేస్తున్న శృతి హాస‌న్... ఆ వెనుక ర‌వితేజ రెండు చేతుల్లో రెండు సున్నుండ‌ల‌ క్యాన్ లు ప‌ట్టుకుని కుర్చొన్నాడు. ముగ్గురు బ్లాక్ అండ్ బ్లాక్ క‌ళ్ల‌ద్దాలు ధ‌రించి ర‌య్ ర‌య్ మంటూ బుల్లెట్ ని ప‌రుగులెట్టించేస్తున్నారు. ఈ ఒక్క పోస్ట‌ర్ తోనే సంక్రాంతి పండుగ సంద‌డేంటో అందులో క‌నిపిస్తోంది. మ‌రోసారి ర‌వితేజ త‌న‌ అభిమానుల‌కు ఏం కావాలో అవ‌న్నీ పోస్ట‌ర్ లోనే చూపించేశాడు.

కావాల్సినంత ఫన్ నేచురాలిటీ నేటివిటీ ఈ ఒక్క‌ పోస్ట‌ర్ లోనే చూపించారు. ఇక ర‌వితేజ లో యాక్ష‌న్ పీక్స్ లోనే ఉంటుంద‌ని తొలి రెండు పోస్ట‌ర్ల‌ లో రివీల్ చేసిన సంగ‌తి తెలిసిందే. ఇక సినిమా రిలీజ్ అయ్యేలోపు ఇలాంటి ట్రీట్స్ మ‌రెన్నో ఉంటాయ‌న‌డంలో సందేహ‌మేం లేదు. గ‌తంలో ర‌వితేజ‌-గోపీచంద్ మ‌లినేని కాంబినేష‌న్ లో తెర‌కెక్కిన డాన్ శీను- బ‌లుపు చిత్రాలు చ‌క్క‌ని విజ‌యాలు అందుకున్న సంగ‌తి తెలిసిందే. బ‌లుపు లో ర‌వితేజ‌కు జోడీగా శృతి హాస‌న్ న‌టించింది. రెండ‌వ‌సారి అమ్మ‌డు మాస్ రాజాతో క్రాక్ లో జ‌త‌క‌డుతోంది.