మాస్ రాజా కొత్త లుక్ చూశారా?

ఈ మధ్యే చేపగా మారిపోయిన నానిని చూశాం. ఇప్పుడు చెట్టుగా మారిన రవితేజ వచ్చేశాడు. నాని నిర్మాణంలో తెరకెక్కుతున్న ‘అ’ సినిమాలో నేచురల్ స్టార్ చేప పాత్రకు వాయిస్ ఇస్తుండగా.. మాస్ రాజా చెట్టు క్యారెక్టర్ కు గొంతు అరువిస్తున్న సంగతి తెలిసిందే. ఆ చెట్టు ఫస్ట్ లుక్ ను ఈ రోజే లాంచ్ చేశారు. చూడగానే ముచ్చటగొలిపేలా చాలా అందంగా ఉంది ఈ చెట్టు. ఇంతకుముందు ‘మర్యాదరామన్న’ సినిమాలో సైకిల్ పాత్రకు మాస్ రాజా వాయిస్ భలే కుదిరింది. అది మంచి వినోదాన్ని పంచింది. మరి ఇప్పుడు చెట్టుకు మాస్ రాజా ఇచ్చే వాయిస్ ఎంతమేర ఆకర్షణ అవుతుందో చూడాలి.

ఈ చిత్రంలో ప్రధాన పాత్రలు పోషిస్తున్న నిత్యా మీనన్. అవసరాల శ్రీనివాస్.. రెజీనా కసాండ్రా.. ఈషా రెబ్బా.. మురళీ శర్మ.. ప్రియదర్శిల లుక్స్ ఇప్పటికే బయటికి వచ్చాయి. ఇక మిగిలింది కాజల్ అగర్వాల్ లుక్ మాత్రమే. సినిమాలో అందరిలోకి పెద్ద తార కాజలే కాబట్టి ఆమె లుక్ ను చివరిగా లాంచ్ చేయనున్నారు. ప్రశాంత్ వర్మ అనే కొత్త దర్శకుడు రూపొందిస్తున్న ‘అ’ చిత్రం ఫిబ్రవరి 2న ప్రేక్షకుల ముందుకు రానుంది. ఇంతకుముందు ‘డి ఫర్ దోపిడీ’ సినిమాకు నిర్మాణ భాగస్వామిగా ఉన్న నాని.. ‘అ’ సినిమాతో పూర్తి స్థాయి నిర్మాతగా మారుతున్నాడు. ప్రశాంత్ వాయిస్ ఓవర్ ఇవ్వమని అడగడానికి వస్తే.. నానికి కథ నచ్చి తనే ఈ సినిమాను నిర్మించడానికి ముందుకొచ్చాడు.