విలక్షణ దర్శకుడితో రవితేజ

ఎక్కువగా మాస్ సినిమాలే చేస్తుంటాడు మాస్ రాజా రవితేజ. ట్రెండుకు తగ్గట్లుగా మారొచ్చుగా.. విభిన్న తరహా సినిమాలు చేయొచ్చుగా అంటే.. అలాంటి సినిమాలు చేసినపుడల్లా ఎదురు దెబ్బలే తగిలాయంటూ ‘నా ఆటోగ్రాఫ్’.. ‘శంభో శివ శంభో’.. ‘సారొచ్చారు’ లాంటి సినిమాల్ని ఉదాహరణగా చూపిస్తుంటాడు మాస్ రాజా. ‘టచ్ చేసి చూడు’ సినిమా ప్రమోషన్లలో కూడా ఇదే మాట అన్నాడు. ఐతే కమర్షియల్ సినిమాల్లోనూ అతడికి బోలెడన్ని డిజాస్టర్లున్న సంగతి మాత్రం మరిచిపోతుంటాడు. ‘టచ్ చేసి చూడు’ కూడా కమర్షియల్ సినిమానే ఫలితం ఏమైందో తెలిసిందే.

ఆ సినిమా రిజల్ట్ చూశాకే మాస్ రాజాలో మార్పు వచ్చినట్లు కనిపిస్తోంది. తాను కూడా వైవిధ్యం చూపించాల్సిన అవసరముందని గ్రహించినట్లున్నాడు.ఆల్రెడీ కమిట్మెంట్లు ఇచ్చిన ప్రకారం కళ్యాణ్ కృష్ణ.. శ్రీను వైట్లల దర్శకత్వంలో సినిమాలు మొదలుపెట్టిన మాస్ రాజా.. దీని తర్వాత ఓ విభిన్నమైన సినిమా చేయడానికి సిద్ధమయ్యాడు. ‘ఎక్కడికి పోతావు చిన్నవాడా’తో మంచి గుర్తింపు పొంది.. ఆ తర్వాత ‘ఒక్క క్షణం’ లాంటి మరో వైవిధ్యమైన సినిమా చేసిన వీఐ ఆనంద్ దర్శకత్వంలో రవితేజ నటించబోతున్నట్లు సమాచారం. రవితేజ-కళ్యాణ్ కృష్ణ కాంబినేషన్లో తెరకెక్కుతున్న చిత్రాన్ని నిర్మిస్తున్న రామ్ తాళ్ళూరినే ఈ చిత్రాన్ని కూడా ప్రొడ్యూస్ చేస్తాడట. ‘ఒక్క క్షణం’ తేడా కొట్టినప్పటికీ మరో వైవిధ్యమైన కాన్సెప్ట్ తో సినిమా చేయాలని ఆనంద్ భావిస్తున్నాడట. మాస్ రాజా కూడా వైవిధ్యం కోసం ఈ సినిమా చేయడానికి ఒప్పుకున్నాడు. త్వరలోనే ఈ సినిమా గురించి అధికారిక ప్రకటన వచ్చే అవకాశముంది.