తన సినిమాకు మానేసి.. పోటీ సినిమాకు ప్రమోషన్

మాస్ రాజా రవితేజ కొత్త చిత్రం ‘ఖిలాడి’ ఇంకో ఐదు రోజుల్లోనే ప్రేక్షకుల ముందుకు రాబోతోంది. ఈ సినిమాపై అంచనాలు భారీగానే ఉన్నాయి. సినిమాకు ఇప్పటికేమంచి హైప్ వచ్చింది. రిలీజ్ ముంగిట మరింత ప్రమోట్ చేసి హైప్ పెంచుతాడనుకుంటే రవితేజ సైలెంటుగా ఉన్నాడు. చిత్ర బృందం సోషల్ మీడియాలో తరచుగా ఏదో ఒక ప్రోమో రిలీజ్ చేస్తూ తమ పని తాము చేస్తున్నప్పటికీ రవితేజ మాత్రం సైలెంటుగా ఉండటం ఆశ్చర్యం కలిగిస్తోంది.

ఏపీలో నైట్ కర్ఫ్యూ, 50 పర్సంట్ ఆక్యుపెన్సీ అమలవుతున్న నేపథ్యంలో రిలీజ్ వాయిదా వేస్తే బెటర్ అని రవితేజ అంటుంటే.. దర్శక నిర్మాతలు మాత్రం ఈ వారమే సినిమాను విడుదల చేయాలని చూస్తున్నారని.. అందుకే రవితేజ హర్టయ్యాడని.. ప్రమోషన్లు చేయకుండా సైలెంటుగా ఉన్నాడని ఒక ప్రచారం నడుస్తోంది. ఇదెంత వరకు నిజమో తెలియదు మరి.

ఐతే తన సినిమా సంగతి పక్కన పెట్టేసి.. దానికి పోటీగా రిలీజయ్యే సినిమాకు రవితేజ సపోర్ట్ ఇస్తుండటం గమనార్హం. ‘ఖిలాడి’ రిలీజయ్యే రోజే.. తమిళ అనువాద చిత్రం ‘ఎఫ్ఐఆర్’ కూడా విడుదలవుతోంది. ఇందులో తమిళ నటుడు విష్ణు విశాల్ హీరగా నటించాడు. అతడికి తెలుగులో పెద్దగా గుర్తింపేమీ లేదు. బ్యాడ్మింటన్ స్టార్ గుత్తా జ్వాల భర్తగానే అతడికి గుర్తింపు ఉంది.

ఐతే విష్ణుకు రవితేజతో స్నేహం ఏమీ లేకపోయినా.. జ్వాల రెఫరెన్స్‌తో దీనికి ఆయన మద్దతు లభించింది. ‘ఎఫ్ఐఆర్’కు రవితేజ సమర్పకుడిగా వ్యవహరిస్తుండటం విశేషం. మాస్ రాజా పేరును చిత్ర బృందం బాగానే వాడుకుంటోంది. అతను సినిమా చూశాడని.. స్యూర్ షాట్ హిట్ అని చెప్పాడని.. సినిమా నచ్చే సమర్పకుడిగా వ్యవహరించడానికి ఒప్పుకున్నాడని చెబుతున్నారు. మాస్ రాజా ఈ సినిమా ప్రమోషనల్ ఈవెంట్‌కు కూడా అతిథిగా రాబోతున్నాడని అంటున్నారు. మరి తన సినిమాకు పోటీగా రిలీజయ్యే చిత్రానికి సపోర్ట్ ఇస్తూ తన చిత్రం ప్రమోషన్ విషయంలో మాస్ రాజా మౌనం వహిస్తుండటం ఆశ్చర్యమే.