మరీ ఈ రేంజు డిజాష్టర్ అనుకోలా?

అనుకున్నంత పని అయింది. అనుకున్నదేమిటి.. అంతకు మించే అయింది. రిలీజుకు ముందు కాస్తో కూస్తో ఉన్న ఆశలు కూడా అడియాశలేనని అర్ధమైపోయింది. మాస్ మహారాజా రవితేజ లేటెస్ట్ మూవీ టచ్ చేసి చూడు డిజాస్టర్ గా మిగిలిపోవడం ఖాయమని దాదాపుగా తేలిపోయింది. అంతేకాదు ఈమధ్య కాలంలో మాస్ మహారాజా నుంచి వరస్ట్ మూవీ ఇదేనని పేరు తెచ్చుకుంది.

టచ్ చేసి చూడు సినిమా మేకింగ్ టైంలోనే హీరో రవితేజకు ఈ సినిమా భవిష్యత్తుపై డౌట్ కొట్టేసిందనే మాట ముందు నుంచే వినిపిస్తోంది. విక్రమ్ సిరికొండ టచ్ చేసి చూడు ఈ మూవీతో డైరెక్టర్ గా ఇండస్ర్టీకి పరిచయం అయ్యాడు. టెంపర్ లాంటి హిట్ మూవీకి స్టోరీ అందించిన రైటర్ వక్కంతం వంశీ రాసిన కథ ఇది. సినిమా మొదలెట్టాక కూడా వక్కంతం వంశీ కథలో చాలా మార్పుచేర్పులు చేసుకుంటూ పోయాడని.. డైరెక్టర్ ఫ్రీ హ్యాండ్ లేకపోవడంతో సినిమా గాడి తప్పిందని యూనిట్ సభ్యుడొకరు తెలిపారు. ఫలితంగా మొదలుపెట్టింది ఒకటైతే పూర్తి చేసింది ఇంకొకటి అయింది.

సినిమా కంప్లీట్ అయ్యాక కూడా ఈ సినిమా ఫలితంపై యూనిట్ పెద్దగా ఆశలేం పెట్టుకున్నట్టు కనిపించలేదు. పెద్దగా పోటీలేని టైం చూసి సినిమా రిలీజ్ చేశారే తప్ప ప్రమోషన్లపై దృష్టి పెట్టలేదు. రవితేజ కూడా ఏదో నామ్ కే వాస్తే అన్నట్టుగా ఒకటి రెండు మాటలు చెప్పి ఊరుకున్నాడు. ఈ సినిమా యావరేజ్ లో బయటపడితే చాలని అంతా అనుకున్నా.. దానికి కూడా చాలా దూరంలోనే నిలిచిపోయింది. డిజాస్టర్ గా మిగిలిపోయింది.