మాస్ రాజా.. 2020లో డిస్కో రాజా

మాస్ రాజా డిస్కో రాజాగా మారబోతున్నాడు. కానీ అందుకు చాలా సమయమే పడుతుంది. బహుశా రవితేజ 2020లో ‘డిస్కో రాజా’గా ప్రేక్షకుల్ని పలకరించే అవకాశముంది. గతంలో అగస్త్యన్.. సముద్రఖని లాంటి తమిళ దర్శకులతో పని చేసి చేదు అనుభవాలు ఎదుర్కొన్న మాస్ రాజా.. మరోసారి ఓ కోలీవుడ్ డైరెక్టర్ తో పని చేయడానికి రెడీ అయినట్లు సమాచారం. ఆ దర్శకుడు మరెవరో కాదు.. ‘రంగం’.. ‘వీడొక్కడే’ లాంటి సినిమాలతో తెలుగు ప్రేక్షకులనూ ఆకట్టుకున్న కేవీ ఆనంద్. వైవిధ్యమైన కథలతో.. రేసీ స్క్రీన్ ప్లేతో సినిమాలు చేసే కె.వి.ఆనంద్.. సూర్యతో మూడో సినిమా తీయడానికి సిద్ధమవుతున్నాడు.

ప్రస్తుతం సెల్వ రాఘవన్ దర్శకత్వంలో ఓ సినిమా చేస్తున్న సూర్య.. ఈ ఏడాది చివర్లో ఆనంద్ సినిమాను మొదలుపెడతాడు. అది వచ్చే ఏడాది ప్రథమార్ధంలో పూర్తవుతుంది. దాని తర్వాత రవితేజతో సినిమా చేస్తాడట ఆనంద్. ఇటీవలే ‘డిస్కో రాజా’ పేరుతో ఒక కథ చెప్పి మాస్ రాజాను మెప్పించాడట ఆనంద్. ఈ చిత్రం షూటింగ్ పూర్తయి విడుదల కావడానికి 2020 అవుతుంది. ప్రస్తుతం రవితేజ కళ్యాణ్ కృష్ణ దర్శకత్వంలో ‘నేల టిక్కెట్టు’ చేస్తున్నాడు. దీని తర్వాత శ్రీను వైట్ల సినిమా చేయాల్సి ఉంది. ఆనంద్ సినిమా కంటే ముందు మరో చిత్రం కూడా మాస్ రాజా పూర్త చేసే అవకాశముంది. త్వరలోనే ఈ ప్రాజెక్టు గురించి అధికారిక సమాచారం బయటికొచ్చే అవకాశముంది.