`100 క్రోర్స్` స్కామ్ లో రావిపూడి క‌నెక్ష‌న్?

రూ.500 నోట్లు.. రూ.1000 నోట్లను ర‌ద్దు చేసిన స‌మ‌యంలో దేశంలో బ్లాక్ మ‌నీ ఎటు పోయింది? అనే వ్య‌వ‌హారంపై ప్ర‌జ‌ల‌కు పూర్తిగా అవ‌గాహ‌న లేదు. వంద‌ల కోట్ల ప‌చ్చ నోట్ల‌ను త‌గ‌ల‌బెట్టిన బ‌డాబాబులున్నారు. ప‌నామా మార్గాల్లో విదేశాల‌కు డ‌బ్బు త‌ర‌లి వెళ్లిపోయింది. పెద్ద నోట్ల ర‌ద్దు త‌ర్వాత తిరిగి 200 నోటు.. 2000 నోటును ప్ర‌వేశ పెట్టిన వైనం తెలిసిందే. అయితే ఇలాంటి ఇంట్రెస్టింగ్ కాన్సెప్ట్ పై సినిమా తీస్తే అది అంద‌రిలో ఉత్కంఠ పెంచుతుందన‌డంలో ఎలాంటి సందేహం లేదు.

ఈ త‌ర‌హా థ్రిల్ల‌ర్ జానర్ మూవీనే- 100 క్రోర్స్. రాహుల్ టైసన్.. చేతన్.. ఎమీ.. ఐశ్వర్య నాయ‌కానాయిక‌లుగా నటిస్తున్నారు. ఈ సినిమాను నూతన దర్శకుడు విరాట్ చక్రవర్తి డైరెక్ట్ చేస్తున్నారు.. శ్రీమతి దివిజా సమర్పణలో యస్.యస్ స్టూడియోస్ - విజన్ సినిమాస్ బ్యానర్స్ లో సాయి కార్తీక్- నాగం తిరుపతి రెడ్డి నిర్మిస్తున్నారు. శ్రీకాంత్ దీపాల సహా నిర్మాత. క్రైమ్ అండ్ యాక్షన్ థ్రిల్లర్ టీజర్ ను దర్శకుడు అనిల్ రావిపూడి తాజాగా విడుదల చేశారు. టీజ‌ర్ ఆద్యంతం ఆస‌క్తిని రేకెత్తించింద‌ని ఆయన ప్ర‌శంసించారు.

2016 నవంబర్ 8న 500 నోట్లు.. 1000 నోట్లను రద్దు చేస్తూ ప్రధాని మోదీ ప్రకటన చేశారు. ఈ అనౌన్స్ మెంట్ వచ్చిన రోజు రాత్రి ఊరి చివర పెద్ద ఎత్తున డబ్బు తగలబెట్టిన ఘటన... అది బ్లాక్ మనీ అయ్యి ఉంటుందనే సందేహం...``మీకు రావాల్సిన అమౌంట్ మొత్తం ఆర్బీఐ ద్వారా బెంగళూరు నుంచి హైదరాబాద్ రోడ్డు మార్గం ద్వారా రావాలి రైట్`` అనే వాయిస్ వినిపిస్తుంది. హై సెక్యూరిటీ కాపలా ఉండే ఈ భారీ మొత్తం డబ్బును ఎవరు కొట్టేశారు ?.. ఎక్కడ దాచారు ?.. ఆ దొంగలను పట్టుకునేందుకు పోలీసులు చేసిన ప్రయత్నాలేంటి ? అనేది సినిమా మీద క్యూరియాసిటీని క్రియేట్ చేస్తోంది.

సంగీత దర్శకుడు సాయి కార్తీక్ నిర్మాతగా చేస్తున్న తొలి సినిమా ఇది. నిర్మాణానంత‌ర ప‌నులు పూర్త‌య్యాయి. త్వరలో విడుదలకు సిద్ధమవుతోంది. సాక్షి చౌదరి- ఐశ్వర్య- సమీర్- శరత్ లోహితీశ్వర్- భద్రం- ఇంటూరి వాసు- షేకింగ్ శేషు- అన్నపూర్ణమ్మ తదితరులు ఈ చిత్రంలో న‌టిస్తున్నారు. చరణ్ మాధవనేని ఈ చిత్రానికి సినిమాటోగ్ర‌ఫీ అందించారు.