పిక్ టాక్: స్టార్ హీరోల ఫస్ట్ ఛాయిస్

టాలీవుడ్ లో ప్రస్తుతం అత్యంత డిమాండ్ ఉన్న హీరోయిన్లలో పూజా హెగ్డే ఒకరు. స్టార్ హీరోల ఫస్ట్ ఛాయిస్ గా మారిన ఈ బుట్టబొమ్మ.. వరుస ఆఫర్స్ తో దూసుకుపోతోంది. అయితే ఇప్పుడు ''ఎఫ్ 3'' సినిమాలో స్పెషల్ సాంగ్ చేయడానికి అంగీకరించి అందరినీ ఆశ్చర్యపరుస్తోంది.

బ్లాక్ బస్టర్ ఫిలిం మేకర్ అనిల్ రావిపూడి దర్శకత్వంలో 'ఎఫ్ 3' సినిమా తెరకెక్కుతోంది. విక్టరీ వెంకటేష్ - మెగా ప్రిన్స్ వరుణ్ తేజ్ ప్రధాన పాత్రల్లో నటిస్తున్న ఈ చిత్రంలో తమన్నా భాటియా - మెహ్రీన్ పిర్జాదా మరియు సోనాల్ చౌహాన్ హీరోయిన్లుగా నటిస్తున్నారు. ఇది 'ఎఫ్ 2' ఫ్రాంచైజీలో రూపొందుతున్న సినిమా.

'ఎఫ్ 2' కంటే పెద్ద హిట్ చేయాలని ఫిక్స్ అయిన దర్శకుడు అనిల్ రావిపూడి.. 'ఎఫ్ 3' సినిమాకి కలిసొచ్చే ఏ అంశాన్నీ వదిలిపెట్టడంలేదు. ఇప్పుడు తాజాగా స్టార్ హీరోయిన్ పూజా హెగ్డేని ఈ రొమాంటిక్ కామెడీ ఎంటర్టైనర్ లో భాగం చేస్తున్నారు.

'F-3' సినిమాలో స్పెషల్ పార్టీ నంబర్ లో పూజా హెగ్డే కాలు కదపనుందని మేకర్స్ ప్రకటించారు. ఈ సమ్మర్ మరింత వేడెక్కబోతుందంటూ శుక్రవారం ఉదయం అమ్మడి ప్రీ లుక్ ని రిలీజ్ చేయగా.. తాజాగా ఆమె ఫస్ట్ లుక్ ని ఆవిష్కరించారు.

ఈరోజు నుంచే ఈ పాట చిత్రీకరణ మొదలైంది. హైదరాబాద్ అన్నపూర్ణ 7 ఏకర్స్ లో ఆర్ట్ డైరెక్టర్ ఏఎస్ ప్రకాష్ పర్యవేక్షణలో నిర్మించిన ప్రత్యేకమైన సెట్ లో ఈ సాంగ్ షూటింగ్ జరుగుతోంది. రాక్ స్టార్ దేవి శ్రీ ప్రసాద్ హుషారైన పెప్పీ అండ్ ఫుట్ ట్యాపింగ్ నంబర్ ను కంపోజ్ చేసినట్లు తెలుస్తోంది.

పూజా హెగ్డేతో పాటు హీరోహీరోయిన్లు మరియు 'ఎఫ్ 3' సినిమాలోని మొత్తం ప్రధాన తారాగణమంతా ఈ పాట చిత్రీకరణలో పాల్గొంటున్నారు. పూజా స్పెషల్ డ్యాన్స్ ఈ సినిమాకి ప్రధాన ఆకర్షణగా నిలుస్తుందని మేకర్స్ భావిస్తున్నారు.

పూజా ఇంతకుముందు 'రంగస్థలం' సినిమాలో 'జిల్ జిల్ జిగేలు రాణి' అనే ఐటమ్ సాంగ్ లో మెరిసింది. మళ్లీ ఇంతకాలానికి ఇప్పుడు మరోసారి 'ఎఫ్ 3' కోసం ఐటమ్ సాంగ్ చేస్తోంది. ఇందుకుగాను కన్నడ సోయగం అధిక మొత్తంలోనే ఛార్జ్ చేస్తోందని నెట్టింట ప్రచారం జరుగుతోంది.

ఇకపోతే 'ఎఫ్ 2' సినిమాలో కనిపించిన రాజేంద్ర ప్రసాద్ - సునీల్ - మురళీ శర్మ - శ్రీకాంత్ అయ్యంగార్ వంటి పలువురు నటులు ''ఎఫ్ 3''లో భాగం అవుతున్నారు. దిల్ రాజు సమర్పకుడిగా వ్యవహరిస్తున్న ఈ చిత్రాన్ని శ్రీ వెంకటేశ్వర క్రియేషన్స్ బ్యానర్ పై శిరీష్ నిర్మిస్తున్నారు. హర్షిత్ రెడ్డి సహ నిర్మాతగా వ్యవహరిస్తున్నారు.

సాయి శ్రీరామ్ సినిమాటోగ్రాఫర్ గా.. తమ్మిరాజు ఎడిటర్ గా బాధ్యతలు నిర్వహిస్తున్నారు. ఎస్ కృష్ణ స్క్రిప్ట్ కోఆర్డినేటర్ గా వర్క్ చేయగా.. ఆది నారాయణ - నారా ప్రవీణ్ అదనపు స్క్రీన్ ప్లే అందిస్తున్నారు. సమ్మర్ కానుకగా మే 27న ప్రపంచ వ్యాప్తంగా థియేటర్లలో మూడింతల నవ్వుల హంగామా సృష్టించడానికి ''ఎఫ్ 3'' సినిమా సిద్ధమవుతోంది.