మాస్ రాజా యమ స్పీడుమీదున్నాడే..

ఇంతకుముందు తన సినిమా ఆర్నెల్లకొకటి విడుదలయ్యేలా చూసుకునేవాడు రవితేజ. కానీ ఆ మధ్య స్పీడు మరీ ఎక్కువై వరుసగా ఫ్లాపులు తిన్నాడు. దీంతో కొంచెం ఆచి తూచి చేసిన బలుపు సినిమా మాస్ రాజాను మళ్లీ సక్సెస్ ట్రాక్ ఎక్కించింది. ఆ తర్వాత పవర్ సినిమాకు కూడా బాగానే టైం తీసుకున్నాడు. అది కూడా బాగానే ఆడింది. దీంతో రవితేజలో మళ్లీ ఉత్సాహం ఊపందుకుంది. ఈ ఏడాది ఆర్నెల్ల గ్యాప్‌లో రెండు సినిమాలు రిలీజయ్యేలా ప్లాన్ చేసుకున్నాడు. కానీ సమ్మర్లో రావాల్సిన కిక్-2 వాయిదాల మీద వాయిదాలు పుడుతూ ఆగస్టుకు వెళ్లిపోయింది.

ఐతే కిక్-2 సంగతెలా ఉన్నా.. సంపత్ నంది దర్శకత్వంలో చేస్తున్న ‘బెంగాల్ టైగర్’ను మాత్రం షెడ్యూల్ ప్రకారం సెప్టెంబరులోనే విడుదల చేయాలని పట్టుదలతో ఉన్నాడు మాస్ రాజా. ఈ సినిమా షూటింగ్ ఇప్పటికే 80 శాతం పూర్తయింది. వచ్చే నెల రోజుల్లో మిగతా షూటింగ్ కూడా పూర్తి చేసి అనుకున్న తేదీకి సినిమా విడుదల చేస్తామని అంటున్నాడు నిర్మాత కె.కె.రాధామోహన్. ‘‘మా బ్యాన‌ర్ లో మాస్‌ మ‌హ‌రాజ్ ర‌వితేజ హీరోగా తెరకెక్కిస్తున్న బెంగాల్ టైగర్ చిత్ర షూటింగ్ శరవేగంగా జరుగుతోంది. ఇప్పటికే దాదాపు 80శాతం చిత్రీకరణ పూర్తైంది. కీలక సన్నివేశాల చిత్రీకరణ ప్రస్తుతం హైదరాబాద్ లో చేస్తున్నాం. ఇంటర్వెల్ బ్యాంగ్ తో పాటు... యాక్షన్ సన్నివేశాల్ని చిలుకూరు, ఎయిర్ పోర్ట్, రింగ్ రోడ్ పరిసర ప్రాంతాల్లో భారీ స్థాయిలో తెరకెక్కిస్తున్నాం. త‌మ‌న్నా, రాశిఖ‌న్నా పెర్ఫామెన్స్ సినిమాకు హైలైట్ గా నిలుస్తుంది. సంప‌త్ నంది అనుకున్న దానికంటే అద్భుతంగా సినిమాను రూపొందిస్తున్నారు. రవితేజ‌, బ్రహ్మానందం కాంబినేషన్లో వచ్చే సన్నివేశాలు కడుపు చెక్కలయ్యేలా నవ్విస్తాయి. బాలీవుడ్ నటుడు బొమన్ ఇరాని క్యారెక్టర్ సినిమాకు హైలైట్’’ అని చెప్పారు.