యంగ్ టాలెంటెడ్ కి ఛాన్స్ ఇస్తున్న మాస్ రాజా!

వెండితెర‌పై మంచి పేరు తెచ్చుకున్న సినిమాటోగ్రాఫ‌ర్ లు ఆ త‌రువాత ద‌ర్శ‌కులుగా రాణిస్తున్న విష‌యం తెలిసిందే. రాజీవ్ మీన‌న్ నుంచి కె.వి. గుహన్ ల వ‌ర‌కు ప‌లువురు సినిమాటోగ్రాఫ‌ర్ లు ద‌ర్శ‌కులుగా త‌మ‌దైన శైలి మూవీస్ ని తెర‌కెక్కించిన మంచి పేరు తెచ్చుకున్నారు.

ఇదే బాట‌లో మ‌రో యంగ్ అండ్ టాలెంటెడ్ సినిమాటోగ్రాఫ‌ర్ ద‌ర్శ‌కుడిగా త‌న అదృష్టాన్నిమ‌రోసారి ప‌రీక్షించుకోబోతున్నాడు. గ‌తంలో నిఖిల్ న‌టించిన 'సూర్య వ‌ర్సెస్ సూర్య‌' మూవీతో ద‌ర్శ‌కుడిగా ప‌రిచ‌యం అయ్యాడు కార్తీక్ ఘ‌ట్ట‌మ‌నేని.

అయితే ఈ మూవీ ఆశించిన ఫ‌లితాన్ని అందించ‌క‌పోవ‌డంతో గ‌త ఏడేళ్లుగా సినిమాటోగ్రాఫర్ గానే కొన‌సాగుతూ 'ప్రేమ ఇష్క్ కాద‌ల్‌', కార్తికేయ‌, ప్రేమ‌మ్ (తెలుగు), ఎక్స్ ప్రెస్ రాజా, నిన్నుకోరి, చిత్ర ల‌హ‌రి.. రీసెంట్ గా 'కార్తికేయ 2' సినిమాల‌కు సినిమాటోగ్రాఫ‌ర్ గా వ‌ర్క్ చేసి మంచి పేరు తెచ్చుకున్నాడు. దాదాపు ఏడేళ్ల విరామం త‌రువాత మ‌ళ్లీ ద‌ర్శ‌కుడిగా మెగా ఫోన్ ప‌ట్ట‌బోతున్నాడు. ఇందులో మాస్ మ‌హారాజా ర‌వితేజ హీరోగా న‌టించ‌నున్నాడ‌ని తెలిసింది.

ర‌వితేజ న‌టించిన 'డిస్కోరాజా', ప్ర‌స్తుతం న‌టిస్తున్న 'ధ‌మాకా' సినిమాలకు కార్తీక్ ఘ‌ట్ట‌మ‌నేని సినిమాటోగ్రాఫ‌ర్ గా వ‌ర్క్ చేశాడు. త‌న వర్క్ న‌చ్చి ర‌వితేజ దర్శ‌కుడిగా అవ‌కాశం ఇస్తున్నాడ‌ని చెబుతున్నారు. ప్ర‌స్తుతం ర‌వితేజ‌తో 'ధ‌మాకా' మూవీని నిర్మిస్తున్న పీపుల్ మీడియా ఫ్యాక్ట‌రీ ఈ ప్రాజెక్ట్ ని నిర్మించ‌బోతోంది. స్టైలిష్ యాక్ష‌న్ థ్రిల్ల‌ర్ గా రూపొంద‌నున్న ఈ మూవీకి 'ఈగిల్' అనే టైటిల్ ని ఫైనల్ చేశార‌ట‌.

ప్ర‌స్తుతం ర‌వితేజ బ్యాక్ టు డ్యాక్ నాలుగు ప్రాజెక్ట్ ల‌లో న‌టిస్తూ బిజీగా వున్నాడు. సుధీర్ వ‌ర్మ డైరెక్ట్ చేస్తున్న 'రావ‌ణాసుర‌', వంశీ రూపొందిస్తున్న 'టైగ‌ర్ నాగేశ్వ‌ర‌రావు', త్రినాథ‌రావు న‌క్కిన 'ధ‌మాకా' చిత్రాల‌తో పాటు చిరు న‌టిస్తున్న 'వాల్తేరు వీరయ్య‌'లో కీల‌క అతిథి పాత్ర‌లో ర‌వితేజ న‌టిస్తున్న విష‌యం తెలిసిందే. ఈ ప్రాజెక్ట్ ల‌లో ఇప్ప‌టికే 'ధ‌మాకా' పూర్తయింది. 'రావ‌ణాసుర‌' చివ‌రి ద‌శ‌కు చేరుకుంది.

'టైగ‌ర్ నాగేశ్వ‌ర‌రావు' షూటింగ్ ద‌శ‌లో వుంది. వీటి త‌రువాతే కార్తిక్ ఘ‌ట్ట‌మ‌నేని మూవీ సెట్స్ పైకి వెళుతుంద‌ట‌. ప్ర‌స్తుతం ఈ మూవీ షూటింగ్ కోసం విదేశాల్లో లొకేష‌న్స్ ని వెతుకుతున్నార‌ట‌. అత్య‌ధిక భాగం విదేశాల్లో షూటింగ్ జ‌ర‌గాల్సి వుండ‌టంతో అక్క‌డి కీల‌క ఘ‌ట్టాల కోసం టీమ్ లొకేష‌న్స్ ని వెతికే ప‌నిలో వుంద‌ని తెలిసింది.