#గుసగుస.. మెగాస్టార్ తో మాస్ రాజా షూట్?

మెగాస్టార్ చిరంజీవి వరుస చిత్రాల్లో న‌టిస్తూ బిజీగా ఉన్న సంగ‌తి తెలిసిందే. రీమేక్ ల‌తో పాటు స్ట్రెయిట్ స్టోరీని ఆయ‌న ఎంపిక చేసుకుని న‌టిస్తున్నారు. వాల్తేరు వీర‌య్య స్ట్రెయిట్ స్టోరీతో తెర‌కెక్కుతోంది. బాబీ (కెఎస్ రవీంద్ర) దర్శకత్వం వహిస్తున్నారు.

ఇది వాల్తేరు(విశాఖ‌)కు చెందిన మెగాభిమాని రియ‌ల్ స్టోరీతో తెర‌కెక్కుతోంద‌ని ఇప్ప‌టికే గుస‌గుస‌లు వినిపించాయి. బాబి ఎగ్జ‌యిట్ చేసే అంశాల‌తో ఈ క‌థ‌ను త‌యారు చేసుకున్నారు. ఇది మాస్ ని థియేట‌ర్ల‌కు ర‌ప్పించే క‌మ‌ర్షియ‌ల్ అంశాలతో ఉంటుంద‌ని ఇంత‌కుముందే వెల్ల‌డైంది.

తాజా స‌మాచారం మేర‌కు.. తదుపరి షెడ్యూల్ జూలై 13న ప్రారంభమవుతుంది. రవితేజ కూడా ఈ చిత్రంలో ఒక కీల‌క పాత్ర‌ధారి. కొత్త షెడ్యూల్ లో రవితేజ- చిరంజీవిలపై కీలక సన్నివేశాలను తెర‌కెక్కిస్తారు. జూలై 18 నుంచి ఈ షెడ్యూల్ లో మాస్ ఇంట్రో సాంగ్ ని చిత్రీకరిస్తారన్నది టాక్ వినిపిస్తోంది.

ఈ సినిమాలో శృతిహాసన్ కథానాయిక. మైత్రీ మూవీ మేకర్స్ ఈ చిత్రాన్ని భారీ ఎత్తున నిర్మిస్తోంది. 2023 సంక్రాంతికి గ్రాండ్ రిలీజ్ చేయడానికి ప్లాన్ చేస్తున్నారు. ఈ సినిమాకి దేవి శ్రీ ప్రసాద్ స్వ‌రాలు అందిస్తున్నారు.

మెగాస్టార్ - మోహ‌న్ రాజా కాంబినేష‌న్ లో గాడ్ ఫాద‌ర్ చిత్రీక‌ర‌ణ పూర్త‌యింది. నిర్మాణానంత‌ర ప‌నులు సాగుతున్నాయి. అలాగే మెహ‌ర్ ర‌మేష్ ద‌ర్శ‌క‌త్వంలో భోళా శంక‌ర్ సెట్స్ పై ఉన్న సంగ‌తి తెలిసిందే. మారుతితోనూ ఓ సినిమా చేయ‌నున్నారు.