బాల‌య్య వందో సినిమాపై టీడీపీ ఎంపీ క్లారిటీ

నంద‌మూరి న‌ట‌సింహం - యువ‌ర‌త్న బాల‌కృష్ణ కేరీర్‌ లో ప్ర‌తిష్టాత్మ‌కంగా తెర‌కెక్కే వందో సినిమా హ‌డావిడి అప్పుడే మొద‌లైంది. బాల‌య్య తాజా చిత్రం డిక్టేట‌ర్ మూవీ షూటింగ్ ఆల్‌ మోస్ట్ కంప్లీట్ అయ్యింది. ఈ సినిమా సంక్రాంతికి ప్రేక్ష‌కుల ముందుకు వ‌స్తోంది. డిక్టేట‌ర్ బాల‌య్య‌కు 99వ సినిమా కాగా...ఈ సినిమా త‌ర్వాత వందో సినిమా ప‌ట్టాలెక్క‌నుంది. అయితే తాజాగా బాల‌య్య వందో సినిమా నిర్మాత గురించి గుంటూరు జిల్లా న‌ర‌సారావుపేట టీడీపీ ఎంపీ రాయ‌పాటి సాంబ‌శివ‌రావు క్లారిటీ ఇచ్చారు.

ఆదివారం డిక్టేట‌ర్ ఆడియో ఫంక్ష‌న్ ఏపీ రాజ‌ధాని అమ‌రావ‌తిలో జ‌రిగింది. ఈ కార్య‌క్ర‌మానికి ముఖ్య అతిథిగా హాజ‌రైన రాయ‌పాటి మాట్లాడుతూ సాయి కొర్రపాటి నిర్మాణంలో బాలకృష్ణ సెంచరీ సినిమా చేస్తున్నారని ప్రకటించారు. దీనికి భగవంతుడి ఆశీసులు ఉండాలని కోరుతున్నట్లు చెప్పారు. దీంతో బాల‌య్య వందో సినిమాకు సాయి నిర్మాత అన్న విష‌యంపై క్లారిటీ వ‌చ్చింది. ఈ సినిమాకు సింహా - లెజెండ్ సినిమాల ద‌ర్శ‌కుడు బోయ‌పాటి శ్రీను ద‌ర్శ‌క‌త్వం వ‌హిస్తాడ‌ని ఎప్ప‌టి నుంచో వార్త‌లు వ‌స్తున్నాయి. ఇదే విష‌యాన్ని బాల‌య్య కూడా ఒక‌టి రెండు సార్లు ప‌బ్లిక్‌ గానే చెప్పారు. దీంతో బాల‌య్య కేరీర్‌ లో ప్రెస్టేజియ‌స్ మూవీగా తెర‌కెక్కే సినిమాకు నిర్మాత‌ - ద‌ర్శ‌కుడు ఖ‌రారైన‌ట్టే.

ఈ సినిమా కోసం ద‌ర్శ‌కుడు బోయ‌పాటి చ‌రిత్ర‌కు ఒక్క‌డు అనే టైటిల్‌ ను కూడా రిజిస్ట‌ర్ చేయించాడ‌ని స‌మాచారం. ప్ర‌స్తుతం బోయ‌పాటి అల్లు అర్జున్‌ తో స‌రైనోడు సినిమాను రూపొందిస్తున్నాడు. ఈ సినిమా వ‌చ్చే స‌మ్మ‌ర్‌ లో ప్రేక్ష‌కుల మందుకు రానుంది. ఈ సినిమా త‌ర్వాత బోయ‌పాటి బాల‌య్య వందో సినిమా స్రిఫ్ట్ ప‌నుల్లో నిమ‌గ్నం కానున్నాడు. ఈ దశాబ్దంలో బాలయ్యకు 'సింహ', 'లెజెండ్'లతో మరపురాని విజయాలు అందించిన బోయపాటి బాల‌య్య వందో సినిమాను కూడా హిట్ చేసి త‌మ‌ది హ్యాట్రిక్ హిట్ కాంబినేష‌న్ అని నిరూపించుకునేందుకు క‌సిగా ఉన్నాడ‌ట‌.