అర్రే.. ఇలియానా వచ్చిందే

అబ్బబ్బా.. ఎన్నాళ్లకొచ్చిందండీ ఇలియానా. ‘జులాయి’ సినిమా తర్వాత హైదరాబాద్ నుంచి దుకాణం ఎత్తేసిన ఇల్లీ బేబీ.. మళ్లీ ఇటు వైపు కన్నెత్తి చూడలేదు. హీరోయిన్ ఆఫర్లు వచ్చినా.. సినిమా ఫంక్షన్లకు పిలిచినా.. ససేమిరా అంది. కనీసం తన హిందీ సినిమాల ప్రమోషన్ కు కూడా హైదరాబాద్ వైపు చూడలేదు. అలాంటమ్మాయి దాదాపు మూడేళ్ల విరామం తర్వాత హైదరాబాద్ లో అడుగుపెట్టింది. మెగాస్టార్ చిరంజీవి 60వ పుట్టిన రోజు వేడుకల్లో ఇల్లీ బేబీ తళుక్కుమంది. ఈ వేడుకలకు చాలామంది బిగ్ సెలబ్రెటీస్ వచ్చారు కానీ.. వాళ్లందరిలోకి ఇలియానా ప్రత్యేకంగా నిలిచింది. చాలా గ్యాప్ తర్వాత ఇక్కడికి రావడం వల్ల కావచ్చు.. ఆమె వేసుకున్న డ్రెస్ వల్ల కావచ్చు.. అందరి దృష్టీ ఇల్లీ మీదే నిలిచిందనడంలో సందేహం లేదు.

మెగా ఫ్యామిలీతో ఇలియానాకు మంచి అనుబంధమే ఉంది. పవన్ కళ్యాణ్ తో జల్సాలో, అల్లు అర్జున్ తో ‘జులాయి’లో నటించింది. పైగా జల్సా అల్లు అరవింద్ సొంత సినిమా. అందువల్లే ‘మెగా 60’ వేడుకలకు పిలిస్తే కాదనలేకపోయింది ఇల్లీ. ఐతే త్వరలోనే తెలుగులోకి రీఎంట్రీ ఇస్తుండటం కూడా ఇలియానా మళ్లీ ఇటువైపు చూడ్డానికి ఓ కారణమని భావించవచ్చు. అఖిల్ తొలి సినిమాలో ఐటెం సాంగ్ చేయడానికి ఇలియానా ఒప్పుకుందని కొన్ని రోజులుగా గుసగుసలు వినిపిస్తున్నాయి. దానికి ఇండికేషన్ గానే మెగా ఫంక్షన్లో ఆమె తళుక్కుమన్నట్లు తెలుస్తోంది. కారణం ఏదైనా ఆరేడేళ్ల పాటు తెలుగు ఇండస్ట్రీని ఏలియా ఇలియానాను మళ్లీ హైదరాబాద్ లో చూడటం ఆమె అభిమానులకు ఆనందమే.