ఆ సినిమా వల్లే ‘స్పైడర్’ను మారుస్తున్నాడు

అంతా అనుకున్నట్లు జరిగితే ఇంకో 50 రోజుల్లోనే ‘స్పైడర్’ సినిమా ప్రేక్షకుల ముందుకు వచ్చేయాల్సింది. కానీ అనివార్య కారణాల వల్ల సినిమా వాయిదా పడిపోయింది. ప్రస్తుతం అందుతున్న సమాచారం ప్రకారం ఈ చిత్రం ఆగస్టు 9న మహేష్ బాబు పుట్టిన రోజు కానుకగా రిలీజవుతుందట. అంటే ఇంకా మూడు నెలలకు పైగా ప్రేక్షకులు ఎదురు చూడాలి.

విజువల్ ఎఫెక్ట్స్ విషయంలో ఆలస్యం అవుతుండటం.. తమిళ వెర్షన్ కోసం ‘స్పైడర్’ క్లైమాక్స్ మారుస్తుండటమే సినిమా వాయిదా పడటానికి కారణం అని వార్తలు వస్తున్నాయి. ఇంతకీ తమిళం కోసం ‘స్పైడర్’ క్లైమాక్స్ ను మార్చాల్సిన అవసరం ఏమొచ్చిందన్న సందేహం తలెత్తడం సహజం. తమిళ ప్రేక్షకులకు మహేష్ కొత్త కాబట్టి.. క్లైమాక్స్ లో హీరోయిజం తగ్గించి.. సింపుల్ గా ముగిస్తున్నట్లుగా ప్రచారం జరిగింది. ఐతే అది వాస్తవం కాదట. ‘స్పైడర్’ క్లైమాక్స్ మార్చాలని మురుగదాస్ భావించడానికి తమిళంలో ఇటీవలే విడుదలైన ‘కావన్’ అనే సినిమా కారణమట.

ఇటీవలే ఈ సినిమా చూసిన మురుగదాస్.. తన సినిమాతో ‘స్పైడర్’కు కొన్ని పోలికలు వచ్చే ప్రమాదం ఉందని భావించాడట. ఆ కంపారిజన్ రాకుండా ఉండేలా ‘స్పైడర్’ క్లైమాక్స్ తో పాటుగా కొన్ని సన్నివేశాల్ని మార్చాడట. ఈ పని కోసం కొంత సమయం కేటాయించాల్సి రావడం.. రీషూట్ల ఎఫెక్ట్ వల్ల ‘స్పైడర్’ కొంత ఆలస్యమవుతున్నట్లు సమాచారం. వీఎఫెక్స్ వర్క్ కూడా కొంత ఆలస్యమవుతుండటంతో సినిమాను జూన్ 23 నుంచి వాయిదా వేయక తప్పలేదట.

Like Us on Facebook : https://www.facebook.com/Tupakidotcom/