రిలీజ్ కు ముందు పూజా అందుకే ప్రమోషన్ చేయలేదా?

సినిమా ఏదైనా.. విడుదల వేళలో ప్రచారం చాలా అవసరం. ఈ కారణంతోనే సినిమా రిలీజ్ డేట్ దగ్గరకు వచ్చే వేళలో ప్రిరిలీజ్ ఫంక్షన్ అని.. కొత్తగా మ్యూజికల్ నైట్ అని ఏర్పాటు చేస్తూ.. సినిమా మీద ఉత్సుకతను పెంచేస్తుంటారు. అంతేకాదు.. సినిమా విడుదలకు ముందు ప్రెస్ మీట్ పెట్టటం.. కొన్ని మీడియా సంస్థలకు ప్రత్యేక ఇంటర్వ్యూలు ఇప్పించటం ద్వారా భారీ మైలేజీ సొంతం చేసుకునే ప్రయత్నం చేస్తారు.

సరిగ్గా సినిమా విడుదలకు ముందు మీడియాలో ఎక్కడ చేసినా తమ సినిమా గురించి మాట్లాడుకునేలా చేసే అలవాటు ఈ మధ్యన ఎక్కువైంది. ఇదే కాదు.. బుల్లితెరలో పాపులర్ షోలకు వెళ్లటం కూడా ఎక్కువైంది. దీనికి చిన్నా.. పెద్దా అన్న తేడా లేకుండా నటులంతా ప్రమోషన్ వర్క్ ను తమ శాయశక్తులా చేస్తుంటారు. ఇలాంటి వాటికి కాస్త దూరంగా ఉండే నయన్ లాంటి వారు చాలా చాలా తక్కువ.

కానీ.. విచిత్రంగా పూజాహెగ్డే తాను నటించిన తాజా చిత్రం.. అల వైకుంఠపురములో.. ప్రమోషన్ కు పెద్దగా కనిపించలేదు. మ్యూజికల్ నైట్ ఫంక్షన్ కు కనిపించిన ఆమె.. ఆ తర్వాత సినిమా సూపర్ సక్సెస్ అయిన తర్వాత చేసిన పార్టీలో కనిపించారు. సినిమా విడుదలకు ముందంతా మీడియాలో బన్నీ.. త్రివిక్రమ్ మాత్రమే కనిపించారు. పూజా కనిపించలేదు.

సినిమా విడుదలకు ముందు ప్రమోషన్ వర్క్ లో కనిపించని పూజా.. ఇప్పుడెందుకు ఇంటర్వ్యూలు ఇస్తున్నట్లు? అన్నది క్వశ్చన్ గా మారింది. అయితే.. సినిమా విడుదలకు ముందు పూజాను ప్రమోషన్ వర్క్ కు వాడలేదు. దీనికి కారణం.. ఆమె ప్రమోషన్ వర్క్ కు వస్తే.. మీడియా ఆమెకు ప్రాధాన్యత ఎక్కువగా ఇవ్వటం.. గ్లామర్ విషయాలే తప్పించి..సినిమాకు పెద్దగా హెల్ప్ కాదన్న ఉద్దేశంతోనే దూరంగా ఉంచినట్లు తెలుస్తోంది.

తాజాగా భారీ హిట్ కొట్టిన నేపథ్యంలో.. సినిమాకు మరింత గ్లామర్ టచ్ ఇవ్వటం కోసం పూజాను రంగంలోకి దింపినట్లుగా చెబుతున్నారు. చూస్తుంటే.. పూజను ప్రమోషన్ వర్క్ కు దూరంగా ఉంచటం ద్వారా అందరి ఫోకస్ సినిమా మీద మాత్రమే ఉండేలా దర్శకుడు ప్లాన్ చేశారన్న మాట వినిపిస్తోంది.