తేజు, రాజులకు ఎక్కడ చెడిందంటే?

ఒక హీరోతో ఓ నిర్మాత వరుసగా మూడు సినిమాలు చేయడమంటే రికార్డ్ అని చెప్పాల్సిందే. అతను కొత్త హీరో అయినా సక్సెస్ లు సాధించడం, ఈయనేమో స్టార్ ప్రొడ్యూసర్.. కాంబినేషన్ ఇంత పక్కాగా సెట్ అవుతున్నపుడు.. వీరి రిలేషన్ కూడా బలపడుతుందని అనుకుంటాం. కానీ సాయి ధరం తేజ్ కు, నిర్మాత దిల్ రాజుకు ఇప్పుడు తేడాలొచ్చాయన్నది ఓపెన్ సీక్రెట్. పిల్లా నువ్వు లేని జీవితం - సుబ్రమణ్యం ఫర్ సేల్ - సుప్రీం చిత్రాలను వరుసగా చేశాక.. నిజానికి తేజు నెక్ట్స్ ప్రాజక్ట్ కూడా దిల్ రాజుతోనే చేయాల్సి ఉంది.

శతమానం భవతి స్టోరీతో తేజును ఓ సారి కలిశాడు వేగేశ్న సతీష్. స్టోరీ నచ్చడంతో తనే తీసుకెళ్లి దిల్ రాజుకు పరిచయం చేశాడు కూడా. దిల్ రాజుకు కూడా కాన్సెప్ట్ నచ్చడంతో.. వెంటనే అడ్వాన్స్ చెల్లించేసి, ఈ మూవీని తన బ్యానర్ లోనే తప్పకుండా చేస్తానని అగ్రిమెంట్ చేసేసుకున్నాడు. సాధారణంగా అయితే ఈ స్టోరీలో సాయిధరం తేజ్ నే హీరోగా తీసుకోవాలి. కానీ ముందు తేజునే అనుకున్నా.. చివరకు ఈ పిక్చర్ రాజ్ తరుణ్ కి వెళ్లిపోయింది.

దీనికి కారణం.. తేజు ప్రపోజల్ కు దిల్ రాజు ఒప్పుకోకవడమేనని తెలుస్తోంది. సుబ్రమణ్యం ఫర్ సేల్ - సుప్రీంలతో దిల్ రాజుకు మంచి లాభాలే వచ్చాయి. అందుకే శతమానం భవతికి రెమ్యూనరేషన్ ఎక్కువగా ఇవ్వాలని సూచించగా.. గతంలో ఇచ్చిన మొత్తానికి మించి ఇచ్చేందుకు దిల్ రాజు సిద్ధపడ్డం లేదట. పైగా అదే సినిమాని రాజ్ తరుణ్ తో చేసేందుకు చర్చలు జరుపుతుండటంతో.. ఈ ప్రాజెక్టు నుంచి తేజు బయటకు వచ్చేశాడని తెలుస్తోంది.