అడ్డాలను అసురన్‌ ఎందుకు నమ్ముతున్నాడు

తమిళంలో ఘన విజయం సాధించిన ధనుష్‌ 'అసురన్‌' చిత్రాన్ని తెలుగులో రీమేక్‌ చేయబోతున్న విషయం తెల్సిందే. సురేష్‌ బాబు మరియు ఒరిజినల్‌ వర్షన్‌ ను నిర్మించిన నిర్మాత కలిసి అసురన్‌ తెలుగు రీమేక్‌ ను నిర్మిస్తున్నారు. వెంకటేష్‌ ఈ చిత్రంలో లీడ్‌ రోల్‌ లో కనిపించబోతున్నాడు. ధనుష్‌ అసురన్‌ లో మంచి నటనతో ఆకట్టుకున్నాడు. ఆ పాత్రను వెంకటేష్‌ ఎలా చేస్తాడా అంటూ అంతా ఆసక్తిగా ఎదురు చూస్తున్నారు. ఇక ఈ రీమేక్‌ బాధ్యతలను శ్రీకాంత్‌ అడ్డాలకు అప్పగించారు.

బ్రహ్మూెత్సవం తర్వాత శ్రీకాంత్‌ అడ్డాలను ఏ ఒక్క హీరో కాని నిర్మాత గాని నమ్మి ఆయనతో సినిమా చేసేందుకు ముందుకు రాలేదు. దాంతో ఇన్నాళ్లు సినిమాలు ఏమీ లేకుండా ఉన్న శ్రీకాంత్‌ అడ్డాల ఇప్పుడు అసురన్‌ కు స్క్రిప్ట్‌ వర్క్‌ లో ఉన్నాడు. ఎంతో మంది దర్శకులు ఉండగా అసురన్‌ రీమేక్‌ బాద్యతలను శ్రీకాంత్‌ అడ్డాలకే సురేష్‌ బాబు.. వెంకటేష్‌ లు ఎందుకు ఇచ్చారంటూ చాలా మంది అనుమానాలు వ్యక్తం చేస్తున్నారు. అడ్డాలకు ఈ రీమేక్‌ బాధ్యతలు ఇవ్వడం సరైన నిర్ణయం కాదంటూ కూడా కొందరు కామెంట్స్‌ చేస్తున్నారు.

ఈ నేపథ్యంలో వెంకటేష్‌ మాట్లాడుతూ అసురన్‌ కు శ్రీకాంత్‌ అడ్డాల తప్పకుండా న్యాయం చేస్తాడనే నమ్మకంను వ్యక్తం చేశాడు. నేను శ్రీకాంత్‌ అడ్డాల దర్శకత్వంలో సీతమ్మ వాకిట్లో సిరిమల్లె చెట్టు సినిమా చేశాను. ఆ సమయంలో ఆయన వర్కింగ్‌ స్టైల్‌ నాకు బాగా నచ్చింది. అందుకే ఆయనతో సినిమాను చేసేందుకు మళ్లీ ఆసక్తిగా ఉన్నాను. ఈ సినిమాతో శ్రీకాంత్‌ తన స్టామినాను నిరూపించుకుంటాడనే నమ్మకం ఉందని వెంకటేష్‌ చెప్పుకొచ్చాడు. ఇటీవలే వెంకీమామ చిత్రంతో ప్రేక్షకుల ముందుకు వచ్చిన వెంకటేష్‌ అసురన్‌ రీమేక్‌ ను అతి త్వరలోనే మొదలు పెట్టే అవకాశం ఉంది.