అందుకే త్రిష వద్దనుకుందా?

త్రిష ఇప్పుడు టాలీవుడ్ లో డిమాండ్ ఉన్న హీరోయిన్ ఏమీ కాదు. డిమాండ్ సంగతి పక్కన పెడితే అసలు తెలుగులో ఆఫర్లే లేవు. ఈ సమయంలో చిరంజీవి - కొరటాల శివ సినిమాలో హీరోయిన్ గా అవకాశం దక్కించుకోవడం అనేది మంచి ఆఫర్ అనే చెప్పాలి. కొరటాల ట్రాక్ రికార్డ్.. మెగాస్టార్ సినిమా.. ఇలా ఏ యాంగిల్ లో చూసుకున్నా త్రిష కెరీర్ కు టాలీవుడ్ లో ప్లస్ అయ్యే అవకాశాలు పుష్కలంగా ఉన్నాయి. అయినా ఈ సినిమా నుంచి తప్పుకున్నానని ప్రకటించి అందరికీ షాక్ ఇచ్చింది.

ఈ సినిమాలో చిరు కాకుండా చరణ్ కూడా ఒక కీలక పాత్ర పోషిస్తున్నాడనే సంగతి తెలిసిందే. ముందు అనుకున్న దానికంటే ఈ పాత్ర ప్రాముఖ్యతను పెంచడం.. ఒక హీరోయిన్ ను కూడా పెట్టాలని భావించడం త్రిషకు నచ్చలేదట. త్రిష ఈ సినిమాకు ఒప్పుకున్నపుడు తనే హీరోయిన్ అని చెప్పారని.. ఇప్పుడు మరో హీరోయిన్ కూడా రావడంతో త్రిష డ్రాప్ అయిందని ఒక వెర్షన్ వినిపిస్తోంది. సీనియర్ హీరో.. ఈ జెనరేషన్ స్టార్ కలిసి నటించే సినిమాలో యంగ్ హీరో తో కాకుండా సీనియర్ హీరోతో జోడీ కడితే ఇక ఫ్యూచర్ లో యంగ్ హీరోలు తనను పరిశీలించరని కూడా డ్రాప్ అయిందని అంటున్నారు. మొదట చరణ్ కు హీరోయిన్ లేకపోవడంతో సరే అని చెప్పిందని.. ఇప్పుడు పరిస్థితి మారడంతో తన నిర్ణయం కూడా మార్చుకుందని అంటున్నారు.

ఇదిలా ఉంటే త్రిష ఈ ప్రాజెక్టు నుంచి తప్పుకున్న తర్వాత త్రిష స్థానంలో కాజల్ అగర్వాల్ ను తీసుకునే దిశగా చర్చలు జరుపుతున్నారని వార్తలు వస్తున్నాయి. పారితోషికం విషయం సెట్ అయితే దాదాపుగా కాజల్ ఖరారయినట్టేనని అంటున్నారు.