వీడియో సాంగ్ :భార్య లేని బ్రదర్స్

వెంకటేష్ వరుణ్ తేజ్ ల కాంబినేషన్ లో అనిల్ రావిపూడి దర్శకత్వంలో రూపొందిన ఎఫ్2 ఫస్ట్ ఆడియో సింగల్ ట్రెండ్ కి భిన్నంగా వీడియో రూపంలో ఇందాకా విడుదల చేసారు. రెండు నిముషాలకు ముప్పై సెకండ్లు తక్కువున్న ఈ వీడియోలో ఇద్దరు అభిమానులకు కావల్సిన స్టఫ్ ని నింపేశారు. భార్యలను ఇంటి దగ్గరే వదిలేసి ఎంజాయ్ మెంట్ పీక్స్ ని రుచి చూడాలనుకున్న ఇద్దరు తోడల్లుళ్లు కలిసి విదేశాలకు వస్తే ఎలాంటి రచ్చ ఉంటుందో అదే ఈ పాట.

క్రికెట్ బంతికి ఫ్రీడమ్ రావడం జాతీయ పండుగలన్నీ ఒకేసారి అందుకోవడం లాంటి ఉపమానాలతో గీత రచయిత కాసర్ల శ్యామ్ దీన్ని క్యాచీ సాహిత్యంతో నింపేసాడు. పూర్తి పాట కాదు కనక ఉన్నంతలో పదాల అల్లిక బాగుందనిపించింది. దేవి శ్రీ ప్రసాద్ ట్యూన్ సో స్పెషల్ గా అయితే లేదు. రెచ్చిపోదాం బ్రదరూ వైఫ్ లేక మస్తుగుంది వెదరూ అనే లైన్ దగ్గర మంచి రిథమ్ ఉంది కానీ మిగిలిన పాట కాస్త రెగ్యులర్ టచ్ లోనే ఉంది.

కాకపోతే వెంకటేష్ వరుణ్ తేజ్ ల మీద చిత్రీకరించిన విధానం బాగుండటంతో చూడదగ్గ క్యాటగిరీలో వచ్చేసింది. బోనస్ గా నట కిరీటి రాజేంద్ర ప్రసాద్ కూడా పాటలో చిందులు వేయడం విశేషం. భార్యలు లేని పాట కాబట్టి తమన్నా-మెహ్రీన్లు కనిపించే ఛాన్స్ లేకపోయింది. పూర్తి లిరికల్ సాంగ్ రేపు అందుబాటులో ఉంచబోతున్నారు. మొత్తానికి లైఫ్ లో వైఫ్ వేధింపులు పాయింట్ మీద రూపొందినట్టు కనిపిస్తున్న ఎఫ్2 ఫస్ట్ సాంగ్ అదే బ్యాక్ డ్రాప్ ఉండటం విశేషం