RAW ఆఫీసర్ గా రెజీనా..!

'శివ మనసులో శృతి' సినిమాతో టాలీవుడ్ లో అడుగుపెట్టిన రెజీనా కాసాండ్రా.. 'రొటీన్ లవ్ స్టోరీ' 'పిల్లా నువ్వు లేని జీవితం' 'పవర్' 'సుబ్రమణ్యం ఫర్ సేల్' 'అ!' వంటి సినిమాలతో తెలుగు ప్రేక్షకులను మెప్పించింది. 'ఎవరు' '7' 'చక్ర' సినిమాలలో నెగిటివ్ షేడ్స్ ఉన్న పాత్రలో నటించింది. ఇలా ఈ బ్యూటీ నటనకు ప్రాధాన్యం ఉన్న పాత్రలతో పాటు గ్లామర్‌ రోల్స్ లో కూడా నటిస్తూ ఆడియన్స్ ని ఎంటర్టైన్ చేస్తూ వస్తోంది. ప్రస్తుతం తెలుగు తమిళ భాషల్లో నటిస్తున్న రెజీనా.. కోలీవుడ్ లో ''బోర్డర్'' అనే యాక్షన్ స్పై థ్రిల్లర్ మూవీ చేస్తోంది.

'బ్రూస్లీ' 'సాహో' వంటి సినిమాలతో తెలుగు ప్రేక్షకులకు పరిచయమైన అరుణ్ విజయ్ హీరోగా నటిస్తున్న లేటెస్ట్ మూవీ ''బోర్డర్''. దర్శకుడు అరివళగన్ తెరకెక్కిస్తున్న ఈ చిత్రాన్ని తమిళంతో పాటు ఇతర భాషల్లోనూ విడుదల చేయనున్నారు. ఇందులో రెజీనా కసండ్రా - స్టెఫీ పటేల్ హీరోయిన్లుగా నటిస్తున్నారు. ఈ చిత్రంలో రెజీనా RAW ఆఫీసర్ గా కనిపించనుంది. తాజాగా ఆమె పాత్రకు సంబంధించిన ఫోటోలు విడుదల చేశారు. రా ఆఫీసర్ గెటప్ లో చేతిలో గన్ పట్టుకొని ఉన్న రెజీనా ఇంటెన్స్ లుక్ లో కనిపిస్తోంది. మరి 'బోర్డర్' సినిమా అమ్మడి కెరీర్ కి ఏ మేరకు హెల్ప్ అవుతుందో చూడాలి.

'బోర్డర్' చిత్రాన్ని విజయ్ రాఘవేంద్ర నిర్మిస్తున్నారు. సామ్ సి.ఎస్. సంగీతం సమకూరుస్తున్నారు. ప్రస్తుతం పోస్ట్ పొడక్షన్ వర్క్ జరుపుకుంటున్న ఈ సినిమాను కోవిడ్ పరిస్థితులు చక్కబడిన తర్వాత విడుదల చేయాలని చూస్తున్నారు. ఇకపోతే రెజీనా తెలుగులో మెగాస్టార్ చిరంజీవి - మెగాపవర్ స్టార్ రామ్ చరణ్ కలిసి నటిస్తున్న 'ఆచార్య' సినిమాలో స్పెషల్ సాంగ్ చేస్తోంది. అలానే 'నేనే నా...?'(సూర్పనాగై) అనే ద్విభాషా సినిమా చేస్తోంది. ఈ క్రమంలో సుధీర్ వర్మ దర్శకత్వంలో 'మిడ్ నైట్ రన్నర్స్' తెలుగు రీమేక్ లో నటిస్తోంది.