లంబాడి పిల్లలా రెజీనా.. సెట్టయిందిలే

టాలీవుడ్ బ్యూటీ రెజీనా కసాండ్రా కెరీర్ ఇన్నేళ్లూ అంత జోరుగా ఏం సాగలేదు. అందంతో పాటు ట్యాలెంట్ ఉన్నా.. పెర్ఫామెన్స్ తో పాటు ఫిజిక్ ఉన్నా.. అమ్మడికి అదృష్టం ఒక్కటీ కలిసిరాలేదు. ఇప్పుడు ఆ కొరత తీరేటట్లుగా కనిపిస్తోంది. క్రియేటివ్ డైరెక్టర్ కృష్ణవంశీ తెరకెక్కిస్తున్న నక్షత్రంలో రెజీనా హీరోయిన్ అన్న సంగతి తెలిసిందే. ఈ సినిమాలో సందీప్ కిషన్ కి జోడీగా రెజీనా నటిస్తుండగా.. ఇప్పుడీ భామ లుక్ ని రివీల్ చేశాడు దర్శకుడు.

కృష్ణవంశీ షేర్ చేసిన ఫోటోలో.. లంబాడీ పిల్ల గెటప్ లో రెజీనా కనిపిస్తోంది. పక్కనే ఓ లంబాడి సాంప్రదాయ నృత్యం చేస్తున్న ఫోటో కూడా ఉందిలెండి. ఇక బిగ్ బీతో రెజీనా ఉన్న ఫోటోను కూడా యాడ్ చేశారు. ఈ లంబాడీ గెటప్ లో రెజీనా భలేగా సెట్ అయిపోయింది. క్రియేటివ్ డైరెక్టర్ కదా.. బాగా శ్రద్ధ తీసుకుని మరీ యాజిటీజ్ గా తయారు చేసేశాడు కృష్ణవంశీ. 'ఈ నక్షత్రం బాలీవుడ్ లో కూడా మెరవబోతోంది. రెజీనా ఇంతటి భారీ ఆఫర్ తో బాలీవుడ్ లో లాంఛ్ కావడం సంతోషంగా ఉంది. అనీస్ బాజ్మీ తీస్తున్న ఆంఖే-2 మూవీలో లెజెండరీ యాక్టర్ బిగ్ బీ.. అనిల్ కపూర్ లతో యాక్ట్ చేయనుంది' అని చెప్పాడు కృష్ణవంశీ.

తను రిలీజ్ చేసిన ఫోటోలో రెజీనా లుక్ పాటలో ఉంటుందా.. సినిమా అంతా ఉంటుందా అన్న సంగతి చెప్పలేదు కానీ.. రెజీనా బాలీవుడ్ గురించి ఈ క్రియేటర్ బాగానే కబుర్లు చెప్పాడు. అదేదో నక్షత్రం గురించి చెప్పచ్చు కదా కృష్ణవంశీ!