బంగారం రెడీ అయినా.. లేటవ్వాల్సిందే

సూపర్ స్టార్ రజినీకాంత్ మూవీ కబాలి రిలీజ్ ఫిక్స్ అయింది. జూలై 22న ప్రపంచవ్యాప్తంగా బ్రహ్మాండమైన విడుదల ఖాయమైంది. కబాలి మూవీ ఇప్పటికే చాలా సినిమాల రిలీజ్ లపై ఎఫెక్ట్ చూపించింది. అన్నిటి కంటే ఎక్కువగా విక్టరీ వెంకటేష్ హీరోగా మారుతి దర్శకత్వంలో రూపొందిన బాబు బంగారంపై ఎక్కువగా ప్రభావం పడింది. ఇప్పటికే జూలై 29న విడుదల కాస్త కష్టమే అనకుంటున్న తరుణంలో.. ఇప్పుడు కబాలి వస్తోంది కాబట్టి.. ఇంకా వెనక్కి వెళ్ళాల్సిన పరిస్థితి వచ్చేసింది.

ఆది నటించిన చుట్టాలబ్బాయి కూడా జూలై 22నే విడుదల కావాల్సి ఉన్నా.. ఇప్పుడు వేరే డేట్ చూసుకోక తప్పదు. ఇక వెంకీ సినిమా సంగతి అయితే మరీ దారుణం. వచ్చే నెలకు పోస్ట్ పోన్ చేసుకోవాల్సిందే. ఇప్పుడు వెంకీకి ఆగస్ట్ 5.. ఆగస్ట్ 26 డేట్స్ మాత్రమే అందుబాటులో ఉంటాయి. ఆగస్ట్ 12 ఎన్టీఆర్-కొరటాల శివల జనతా గ్యారేజ్ వస్తుండడంతో.. కనీసం రెండు వారాల గ్యాప్ ఇవ్వాల్సిన సిట్యుయేషన్. ఆగస్ట్ 5 విడుదల చేస్తే.. ఒక వారం తర్వాత చాలా థియేటర్లు ఖాళీ చేయాల్సి వస్తుంది. అందుకే ఆగస్ట్ చివర్లో తప్పితే రిలీజ్ డేట్ సెట్ చేసుకునే ఛాన్స్ బంగారానికి లేదు.

కబాలి మూలంగా ఇదంతా అని చెప్పుకోవడమే కానీ.. జూలై 29న వచ్చేసేంతగా బాబు బంగారం రెడీ కాలేదు. ఒక పాట- కొన్ని సీన్స్ కోసం నయనతార డేట్స్ విషయంలో ఇంకా చర్చలు జరుగుతూనే ఉన్నాయి. ఇటు స్వయంకృతరాధం అటు కబాలి తెచ్చిన అడ్డం.. అన్నీ కలిపి బాబు బంగారాన్ని ఓ నెల్లాళ్లకు పైగా వాయిదా పడేలా చేశాయి.